Ադրբեջանն արգելակում է բանակցային գործընթացը՝ հրաժարվելով Ղարաբաղի հետ բանակցելուց, «Նովոստի-Արմենիա» գործակալությանը ասաց ՀՀ փոխարտգործնախարար Շավարշ Քոչարյանը:
«Հրաժարվելով Լեռնային Ղարաբաղի հետ բանակցելուց՝ Ադրբեջանն արգելակում է բանակցությունների առաջընթացը, և միևնույն է՝ չի կարող խուսափել իր սանձազերծած ագրեսիայի հետևանքների համար պատասխանատվությունից», - նշեց Քոչարյանը՝ մեկնաբանելով նախօրեին Ադրբեջանի ԱԳ նախարար Էլմար Մամեդյարովի արած հայտարարությունները:
Նախօրեին Ադրբեջանի ԱԳ նախարարը հայտարարել է, որ Լեռնային Ղարաբաղի ապագա կարգավիճակը սահմանվելու է հակամարտող կողմերի միջև ընթացող բանակցությունների արդյունքում, և դա հնարավոր է միայն այն բանից հետո, երբ հայկական ուժերը դուրս գան, այսպես կոչված, «օկուպացված» տարածքներից, ադրբեջանցի հարկադիր տեղահանվածները վերադառնան իրենց մշտական բնակության վայրեր, վերականգնվեն դրանց ենթակառուցվածքները, ապահովվի ադրբեջանական և հայկական համայնքների խաղաղ բնակությունը: Մամեդյարովը նաև նշել է, որ ըստ Ադրբեջանի Սահմանադրության՝ երկրի տարածքային ամբողջականությանը վերաբերող հարցերը լուծվում են երկրի ողջ տարածքում անցկացվող հանրաքվեի միջոցով:
«Պարոն Մամեդյարովը ներկայացրել է լրագրողներին, թե ինչ արդյունքների կարող է հասնել, եթե բանակցությունները վարի ինքն իր հետ, և եթե միայն Ադրբեջանը մշակի և Ադրբեջանը ինքն իր հետ ստորագրի խաղաղության պայմանագիրը», - ասաց Քոչարյանը:
«Ակնհայտ է, որ Ադրբեջանի արտգործնախարարի վերջին հայտարարությունը հերթական անհաջող փորձն է Ադրբեջանի Սահմանադրությամբ արդարացնելու ինքնորոշված ԼՂՀ դեմ ՄԱԿ-ի կանոնադրության կոպիտ ոտնահարումով ագրեսիայի իրականացումը», - ավելացրեց ՀՀ փոխարտգործնախարարը:
Նրա խոսքերով՝ Այդ Սահմանադրությունն ընդունվել է ԼՂՀ-ի հետ զինադադարի կնքումից հետո, ու որևէ կերպ չի առնչվում Լեռնային Ղարաբաղի Հանրապետությանը, որն ունի իր սեփական Սահմանադրությունը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
