Հայ-թուրքական սահմանի բացումը կախված է Թուրքիայից. «Բարգավաճ Հայաստան» կուսակցության առաջնորդ
Հայ-թուրքական սահմանի բացումը կախված է Թուրքիայից, կարծում է «Բարգավաճ Հայաստան» կոալիցիոն կուսակցության առաջնորդ Գագիկ Ծառուկյանը։
«Մենք չենք փակել Թուրքիայի հետ ճանապարհը, այն փակ է Թուրքիայի կողմից 1993 թվականի ղարաբաղյան պատերազմի ժամանակ։ Սահմանն այժմ պետք է բացի Թուրքիան։ Եթե նրանք չեն ցանկանում բացել սահմանն առանց նախապայմանների, թող չբացեն»,- երկուշաբթի լրագրողներին ասաց Ծառուկյանը։
Ըստ նրա՝ «Բարագավաճ Հայաստան» կուսակցությունը և ինքն անձամբ կողմ է սահմանների բացմանը, Թուրքիայի հետ դիվանագիտական հարաբերությունների հաստատմանն առանց նախապայմանների, ինչի մասին հայտարարել են ամենասկզբից, և առայսօր դիրքորոշումը չի փոխվել։
Միաժամանակ կոալիցիոն կուսակցության առաջնորդը նշեց, որ Հայոց ցեղասպանության փաստը չի կարող վեճի առարկա դառնալ հարաբերությունների բարելավման գործընթացում, իսկ ղարաբաղյան հակամարտության կարգավորումը չի կարող նախապայման լինեն այդ գործընթացում։
«Թուրքիան չի կարող մեզ վրա ճնշում գործադրել, քանի որ հայ-թուրքական արձանագրությունները քանի դեռ չեն վավերացվել Թուրքիայում, մենք դրանք չենք վավերացնի։ Մենք ապացուցում ենք, որ մեր խոսքի տերն ենք՝ հանդես ենք գալիս հարաբերությունների բարելավման օգտին, բայց առանց նախապայմանների ղարաբաղյան կամ Հայոց ցեղասպանության հարցում»,- ասաց նա։
Միաժամանակ կոալիցիոն կուսակցության առաջնորդն ասաց, որ հայ-թուրքական գործընթացի հետագա ճակատագրի որոշման համար պետք է սպասել ապրիլի 24-ին և այնուհետև որոշել հետագա անելիքը։
Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
