Մոսկվայում մարտի 21-23-ը կանցկացվի ռուս-հայկական միջխորհրդարանական համագործակցության հանձնաժողովի նիստը, հաղորդում է ՀՀ ԱԳՆ մամուլի ծառայությունը:
Ըստ տեղեկատվության՝ կայանալիք նիստին առնչվող հարցերը քննարկվել են ՌԴ Դաշնային ժողովի և ՀՀ Ազգային ժողովի միջև համագործակցության միջխորհրդարանական հանձնաժողովի համանախագահ, ՌԴ բնական մենաշնորհների հանձնաժողովի նախագահ Նիկոլայ Ռիժկովի և ՌԴ-ում ՀՀ արտակարգ և լիազոր դեսպան Օլեգ Եսայանի հանդիպման ընթացքում:
«Նիկոլայ Ռիժկովը նշել է, որ հանձնաժողովը զգալի աշխատանքներ է ծավալել հայ-ռուսական պատմական մշակույթի, տնտեսական կապերի ամրապնդման և զարգացման ուղղությամբ», - ասվում է տեղեկատվության մեջ:
Բարձր գնահատելով Նիկոլայ Ռիժկովի արժանիքները հայ ժողովրդին մատուցած ծառայությունների համար՝ դեսպան Եսայանը նշել է, որ իր գործունեությունը կուղղի հայ-ռուսական համագործակցության փոխշահավետ զարգացամանը:
Զրուցակիցները մտքեր են փոխանակել հայ-թուրքական հարաբերությունների և ԼՂ հիմնախնդրի կարգավորման բանակցային գործընթացի վերաբերյալ:
Նիկոլայ Ռիժկովը շնորհավորել է Օլեգ Եսայանին ՌԴ-ում ՀՀ դեսպանի պաշտոնում նշանակվելու կապակցությամբ՝ նշելով, որ տեղյակ է նրա բեղմնավոր աշխատանքի մասին՝ որպես Բելառուսում ՀՀ դեսպան, և համոզմունք է հայտնել, որ իր անցած կյանքի ուղին և փորձը կնպաստեն հայ-ռուսական հարաբերությունների հետագա զարգացմանը։-0-
