Հայաստանը կսկսի հայ-թուրքական արձանագրությունների վավերացումը միայն Թուրքիայի վավերացումից հետո
Հայաստանը կսկսի հայ-թուրքական արձանագրությունների վավերացումը միայն այն ժամանակ, երբ դրանք կվավերացվեն Թուրքիայի խորհրդարանում, ասել է ՀՀ ԱԺ խոսնակը:
Նրա խոսքերով, հայ-թուրքական հարաբերությունների կարգավորումը կնպաստի տարածաշրջանային համագործակցության ընդլայնմանը:
«Մենք հարաբերությունների կարգավորումը դիտարկում ենք առանց նախապայմանների, ինչն ամրագրված է արձանագրություններում, որոնք սպասում են վավերացմանը երկու երկրների խորհրդարաններում», - ասել է Աբրահամյանը՝ հինգշաբթի ելույթ ունենալով ՆԱՏՕ-ի Խորհրդարանական Վեհաժողովի «Ռոուզ Ռոթ» սեմինարի բացման ժամանակ:
Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Անդրադառնալով ղարաբաղյան հակամարտության կարգավորմանը՝ Աբրահամյանը նշել է, որ Հայաստանը բազմաթիվ անգամ հայտարարել է, որ ղարաբաղյան հակամարտությունը պետք է լուծվի միայն Լեռնային Ղարաբաղի ժողովրդի ինքնորոշման սկզբունքի հիման վրա՝ միջազգային իրավունքի նորմերի համաձայն:
«Հիշեցնեմ, որ 2009թ.-ի դեկտեմբերի 18-ին ՄԱԿ-ի Գլխավոր Ասամբլեայի 64-րդ նստաշրջանի ժամանակ ընդունվել է ժողովուրդների ինքնորոշման իրավունքի մասին բանաձևը, որի համահեղինակներն են նաև Հայաստանն ու Ադրբեջանը», - ասաց նա:
Նրա խոսքերով, բանաձևը ևս մեկ անգամ հաստատում է միջազգային իրավունքի այդ սկզբունքը կյանքի կոչելու անհրաժեշտությունը և կոչ է անում հատուկ ուշադրություն դարձնել այդ սկզբունքի խախտմանը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
