ԵՐԵՎԱՆ, 9 մարտի. /Նովոստի-Արմենիա/. «Վերին Լարս» անցակետի բացումը Ռուսաստանի և Վրաստանի միջև քաղաքական փոխհարաբերությունների բարելավման պատուհանն է, երեքշաբթի ասաց Կովկասի ինստիտուտի տնօրեն Ալեքսանդր Իսկանդարյանը ՌԻԱ Նովոստիի կազմակերպած «Վերին Լարս հսկիչ անցակետի բացումը ռուս-վրաց-հայկական շահերի համատեքստում» թեմայով Երևան-Մոսկվա-Թբիլիսի տեսակամուրջի ընթացքում:
Վրաստանի և Ռուսաստանի սահմանի վրա գտնվող «Կազբեկի-Վերին Լարս» հսկիչ-անցակետը բացվել է մարտի 1-ին առավոտյան ժամը 06:00-ին: Ռուս-վրացական սահմանի ցամաքային հատվածի վրա գտնվող «Կազբեկի-Վերին Լարս» միակ պաշտոնական հսկիչ-անցակետը չէր գործում երեք տարի: Այն փակվել էր ռուսական կողմի որոշմամբ՝ ելնելով անցակետի վերանորոգման և ժամանակակից չափորոշիչներին համապատասխան զինելու անհրաժեշտությունից:
2009թ.-ի մայիսի սկզբին ռուսական կողմն ավարտեց «Վերին-Լարս» նոր միջազգային ավտոմոբիլային հսկիչ-անցակետի շինարարությունը: Վրաստանն իր կողմից ԱՄՆ-ի օգնությամբ ավարտեց հսկիչ-անցակետի վերանորոգումը 2009թ.-ի սեպտեմբերին:
Ինչպես կարծում է Իսկանդարյանը, ռուս-վրացական հարաբերությունները, ցավոք սրտի, այն վիճակում են, որ ներկայիս քաղաքական ձևաչափում կտրուկ բարելավում պատկերացնելն անհնար է, «հատկապես վրացական պաշտոնական դիրքորոշման համատեքստում, համաձայն որի ՌԴ հետ փոխհարաբերությունները կարող են հաստատվել «ապաշրջափակումից» հետո:
«Ռուսական կողմից ներկա պահին նման բան պատկերացնելը բարդ է»,- նշեց փորձագետը:
«Այդ իսկ պատճառով Ռուսաստանի ու Վրաստանի միջև քաղաքական հարաբերությունների բարելավումը քիչ հավական է, դրանք որոշակի անպատասխանատվությամբ կարելի է հակամարտության վերաձևաչափավորում համարել»,- ասաց Իսկանդարյանը:
Փորձագետի կարծիքով, Ռուսաստանի ու Վրաստանի միջև քաղաքական հակամարտությունը փաստորեն մնում է գրեթե նույն վիճակում, ինչում եղել է, իսկ հակամարտության մնացած բաղկացուցիչները վերացվում են կամ մեղմացվում, մասնավորապես, մարդասիրականն ու տնտեսականը:
Քաղաքագետն ընդգծեց նաև, որ աշխարհում կան սուր և կոշտ հակամարտություններ, ինչպիսին են, օրինակ, կիպրոսյան ու մերձդնեստրյան հակամարտությունները, որտեղ կողմերի կոշտ հայտարարությունների լարվածությունն առկա է, բայց մարդասիրական ու տնտեսական կապը կողմերի միջև պահպանվում է և գրեթե երբեք չի ընդհատվել:
Ռուս-վրացական հարաբերությունների համատեքստում փորձագետը որպես օրինակ բերեց գազի մատակարարման իրավիճակը, երբ օգոստոսյան պատերազմի ժամանակ մոտ մեկ օրով ընդհատվեց Վրաստանի գազամատակարարումը:
«Դա կտրված իրադարձություն չէ, կարծում եմ, որ վաղ, թե ուշ իրավիճակը կհանգի նրան, որ չվերթերը կդառնան կանոնավոր, այլ ոչ թե պատվիրված, բայց դա տեղի կունենա մուտքի արտոնագրերի հետ կապված իրավիճակի թուլացման դեպքում»,- ասաց Իսկանդարյանը: -0-
