Հայ փրկարարները նախորդ հանգստյան օրերին հայտնաբերել են սեփական բնակարաններում մահացած երկու տարեց մարդկանց մարմիններ

ԵՐԵՎԱՆ, 1 մարտի. /Նովոստի-Արմենիա/. Հայ փրկարարները նախորդ հանգստյան օրերին հայտնաբերել են սեփական բնակարաններում մահացած երկու տարեց մարդկանց մարմիններ, ևս մեկ կնոջ հաջողվել է փրկել, երկուշաբթի հաղորդում է ՀՀ ԱԻՆ Փրկարար ծառայությունը:

«Փետրվարի 27-ին, ժամը 13.15-ին Սևան քաղաքի ոստիկանության բաժնից ահազանգ է ստացվել այն մասին, որ նույն քաղաքի բնակարաններից մեկում հնարավոր է դիակի առկայություն, և դուռը բացելու համար անհրաժեշտ է փրկարարների օգնությունը: Դեպքի վայր է մեկնել մեկ մարտական հաշվարկ, բացելով բնակարանի դուռը՝ հայտնաբերվել է տանտիրուհու` 1950 թ. ծնված Ա. Գևորգյանի դին», - ասվում է տեղեկատվության մեջ:

ՀՀ ԱԻՆ-ի տվյալների համաձայն՝ կիրակի կեսօրին Գավառ քաղաքի բնակարններից մեկում նմանատիպ հանգամանքներում փրկարարները հայտնաբերել են 74-ամյա Ռազմիկ Սիրականյանի դին:

Միաժամանակ, ինչպես հաղորդում է ՀՀ ԱԻՆ-ը, մայրաքաղաքի փրկարարներին հաջողվել է փրկել նմանատիպ հանգամանքներում հայտնված մի կնոջ կյանքը: Դեքպի վայր մեկնած փրկարարները, բացելով բնակարանի դուռը, հայտնաբերել են 74-ամյա Մառլենա Հովսեփյանին` անգիտակից վիճակում: Փրկարարների կողմից տուժածին ցույց է տրվել առաջին բուժօգնություն:-0-