Հայաստանը թուրքական շրջափակման տարիներին կորցրել է 13-14 մլրդ դոլար. ռուս փորձագետ
Հայաստանը թուրքական շրջափակման տարիներին 13-14 մլրդ դոլար է կորցրել, կարծում է աշխարհաքաղաքական խնդիրների ռուսական ակադեմիայի փոխնախագահ Արայիկ Սարգսյանը:
«Միայն շրջափակման հետևանքով Հայաստանը վերջին 2 տասնամյակում 13-14 մլրդ դոլար է կորցրել»,- չորեքշաբթի մամուլի ասուլիսի ժամանակ ասաց նա:
Ընդ որում Սարգսյանը համարում է, որ Հայաստանի ու Թուրքիայի միջև բանակցությունների «կնքահայրը» ԱՄՆ Պետդեպարտամենտն է, որը չափազանց շահագրգռված է հայ-թուրքական սահմանի բացմամբ: Ինչպես նշեց ռուս փորձագետը, հայ-թուրքական սահմանը հարաբերական հասկացություն է, քանի որ օդային սահմանը երկու երկրների միջև բաց է:
«Այն այնքան բաց է, որ Թուրքիայի տարածքով թռչելիս՝ կարելի է SMS կամ էլեկտրոնային նամակ ուղարկել»,- ասաց Սարգսյանը:
Ընդ որում, ըստ նրա, հայ քաղաքացիները միայն անցյալ տարի Թուրքիայի հանգստավայրերում թողել են շուրջ 52 մլն դոլար, և Հայաստանն ամեն տարի Թուրքիայում գնում է 300-350 մլն դոլարի ապրանք: Սարգսյանը հայտնեց, որ Թուրքիայում աշխատում է շուրջ 7-8 հազ. աշխատանքային միգրանտ Հայաստանից:
Փորձագետի խոսքերով, նախագահ Օբամային անքնությունը չի տանջում Հայերի Ցեղասպանության ճանաչման անհրաժեշտության պատճառով: ԱՄՆ-ի համար Ցեղասպանության ճանաչումը Անկարայի վրա ներգործելու լծակ է: Թուրքիային ևս առանձնապես չի հուզում, որ Օբաման հայոց Ցեղասպանության զոհերի հիշատակման օրը ԱՄՆ-ում հայկական համայնքին իր ամենամյա ուղերձում կարտաբերի «ցեղասպանություն» բառը կամ Կոնգրեսը կճանաչի այն:
Ամերիկային, ինչպես կարծում է Սարգսյանը, պարզապես պետք է, որ շտապ բացվի հայ-թուրքական ցամաքային սահմանը Աֆղանստանին ռազմական բեռներ մատակարարելու նպատակով:
«Այսպիսով, ԱՄՆ-ն Հայաստանի, Թուրքիայի և Ադրբեջանի հետ երկակի և անգամ եռակի խաղ է տանում հայ-թուրքական ցամաքային սահմանի բացման և ռազմական բեռների փոխադրում իրականացնելու համար»,- նշեց նա:
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
