Եվա Ռիվասը ազգային ընտրության ժամանակ կներկայացնի ծրագրված շոուի միայն մի հատվածը

ԵՐԵՎԱՆ, 9 փետրվարի. /Նովոստի-Արմենիա/. Եվա Ռիվասը փետրվարի 14-ին Հայաստանում Եվրատեսիլ-2010 ազգային ընտրության եզրափակչի ժամանակ կներկայացնի Օսլոյում հաղթանակի դեպքում ելույթի համար պատրաստվող շոուի մի փոքր մասը, երեքշաբթի լրագրողներին հայտնեց երգչուհու պրոդյուսեր, «Արմենիա փրոդաքշն» պրոդյուսերական կենտրոնի ղեկավար Վալերի Սահարյանը։

Սահարյանը հավելեց, որ ազգային ընտրության եզրափակչի ժամանակ հեռուստադիտողները պետք է ընտրեն երգը, որը կներկայացնի Հայաստանը Օսլոյում, այլ ոչ թե շոուն, և նշեց, որ նպատակահարմար չի լինի նախօրոք բացել բոլոր խաղաքարտերը։ «Մեր խնդիրն այնտեղ՝ Օսլոյում հաղթելն է»,- ընդգծեց նա։  

Լրագրողների հարցին, թե իսկապես դուդուկի պարտիան երգում կատարելու է աշխարհահռչակ դուդուկահար Ջիվան Գասպարյանը, Սահարյանը պատասխանեց, որ «փետրվարի 14-ին կլինի միայն ինչ-որ կերպար, դուդուկ նվագող մարդու պատկեր։ Ես ուզում եմ, որ ամեն ինչ գաղտնի մնա մինչև Օսլոյի համերգը»։

«Ինչ վերաբերում է անձամբ ինձ, ապա ես պատրաստ եմ թեկուզ վաղը դուրս գալ ու արժանի ելույթ տալ։ Ես կգնամ ու կհաղթեմ»,- իր հերթին հայտարարեց Ռիվասը։ 

Նա հավելեց, որ իր գլխավոր նպատակը միջազգային մակարդակում հայկական երգի ճանաչմանը հասնելն է։

Ռիվասն ընդգծեց, թե հպարտ է, որ հայ է, երբեք դա չի թաքցրել, և խոստացավ, որ այս ամսվա ընթացքում այնքան կկատարելագործի հայերենի իմացությունը, որ մամուլի հետ հայերեն հաղորդակցվի։

Եվա Ռիվասի «Apricot Stone» երգի շնորհանդեսին, որով նա հանդես կգա Հայաստանում Եվրատեսիլ-2010-ի ազգային ընտրությունում, իր պրոդյուսերները հրավիրել էին Եվրատեսիլի առաջին հաղթող 86-ամյա շվեյցարուհի Լիզ Ասիային, ով մրցույթը հաղթել է 1956 թ.-ին «Refrain» երգով։  

Ասիան, նշելով Եվայի գեղեցկությունն ու վոկալ տվյալները, նրան հաջողություն մաղթեց մրցույթում, ինչպես նաև հավաքված լրագրողների ու հյուրերի համար կատարեց մի երգ իր նախկին երգացանկից։ 

Եվրատեսիլի ընտրական փուլին Ռիվասը ներկայացրել է «Abricot stone» («Ծիրանի կորիզ») կոչվող մի երգ, որի երաժշտության հեղինակը արվեստի վաստակավոր գործիչ, կոմպոզիտոր Արմեն Մարտիրոսյանն է, իսկ խոսքերի հեղինակը՝ ճանաչված բանաստեղծ և կոմպոզիտոր Կարեն Կավալերյանը, ով գրել է նախորդ Եվրատեսիլներին ներկայացված մի շարք երգեր։ -0-