ԱՄՆ Կոնգրեսում Հայոց ցեղասպանության բանաձևի ընդունումը լարվածություն կառաջացնի Թուրքիայի և ԱՄՆ-ի հարաբերություններում. Asbarez
ԱՄՆ Կոնգրեսում Հայոց ցեղասպանության ճանաչման մասին բանաձևի քննարկումն ու ընդունումը անցանկալի լարվածություն կառաջացնի Թուրքիայի և ԱՄՆ-ի հարաբերություններում, կարծում է ԱՄՆ-ում Թուրքիայի նորանշանակ դեսպան Նամիկ Թանը, հաղորդում է ԱՄՆ-ի հայկական սփյուռքի «Asbarez» թերթը:
«Երեքշաբթի իր ելույթի ժամանակ Թանը հույս է հայտնել, որ ԱՄՆ-ն` որպես Թուրքիայի դաշնակից, որևէ թշնամական քայլ չի ձեռնարկի», - ասվում է տեղեկատվության մեջ:
Ըստ թերթի, Թանը հայտարարել է, որ «Թուրքիան պատմական քայլ է կատարել՝ ստորագրելով հայ-թուրքական արձանագրություննները դրանց մեջ չամրագրելով որևէ նախապայման»:
Միաժամանակ դեսպանը նշել է, որ ոչ 2010 թ.-ի ապրիլին, ոչ էլ հետագայում Հայոց ցեղասպանության ճանաչման մասին որևէ բանաձև ԱՄՆ Կոնգրեսում չի հայտնվի:
«Թանի խոսքերով, նման քայլը, հատկապես այն ժամանակ, երբ երկու երկրի միջև հարաբերությունները շատ արդյունավետ են, կարող է լրջորեն ազդել Կովկասում խաղաղության հաստամանն ուղղված փորձերի և գործընթացի վրա»:
Մեկնաբանելով Թանի հայտարարությունը՝ Ամերիկայի հայկական ազգային կոմիտեի գործադիր տնօրեն Արամ Համփարյանն իր հերթին ասել է, որ «Թանի հայտարարությունն ազդանշան է, որը հաստատում է Թուրքիայի կառավարության կողմից ծրագրված «արձանագրային» պլանի ձախողումը, որն ուղղված է Անկարայի հիմնական նպատակի՝ Հայոց ցեղասպանության միջազգային ճանաչման և դատապարտման գործընթացի ձախողման ձեռքբերման վրա», - ասվում է տեղեկատվության մեջ:-0-
