Կոռուպցիոն ռիսկերը շարունակում են մնալ Հայաստանի կրթական համակարգի հիմնական խնդիրը. նախարար
![Կոռուպցիոն ռիսկերը շարունակում են մնալ Հայաստանի կրթական համակարգի հիմնական խնդիրը. նախարար Կոռուպցիոն ռիսկերը շարունակում են մնալ Հայաստանի կրթական համակարգի հիմնական խնդիրը. նախարար](/upload/iblock/03d/ey8k27xnk7gt7aop2m3xgi2aw1h7i811.jpg)
ՀՀ կրթական համակարգի գլխավոր խնդիրը շարունակում են մնալ կոռուպցիոն ռիսկերը, ուրբաթ մամուլի ասուլիսի ժամանակ հայտարարեց կրթության և գիտության նախարար Արմեն Աշոտյանը:
«Մենք իրատեսորեն ենք նայում մեր խնդիրներին և բացթողումներին, և անիմաստ է աչք փակել կոռուպցիայի նման խնդրի վրա», - ասաց նախարարը:
Նրա խոսքերով՝ կոռուպցիոն ռիսկերը հատկապես բարձր են բարձրագույն կրթության համակարգում, սակայն դպրոցների շրջանում ևս իրավիճակը մտահոգիչ է:
Աշոտյանը կարևորեց կոռուպցիայի դեմ պայքարում բնակչության շահագրգիռ շերտերի ներգրավումը:
Նախարարի կարծիքով՝ ևս մեկ մտահոգիչ խնդիր է հատուկ դպրոցներում ստեղծված իրավիճակը:
«Վերջերս մեծ աղմուկ էր առաջացել Հայաստանի հատուկ դպրոցներից մեկում երեխաների իրավունքների խախտման կապակցությամբ: Այդ դեպքից հետո ես որոշում ընդունեցի խստացնել վերահսկողությունը նման հաստատություններում», - նշեց նա:
Նախարարը տեղեկացրեց, որ այդ նպատակով կստեղծվի քաղաքացիական վերահսկողության խորհուրդ, որի մեջ կներգրավվեն շահագրգիռ հասարակական կազմակերպությունները:-0-