Հայկական արմատական ընդդիմությունը չի ծրագրում հանրահավաք անցկացնել խորհրդարանական լրացուցիչ ընտրությունների կապակցությամբ

Ընդդիմադիր Հայ ազգային կոնգրեսը չի ծրագրում հանրահավաք անցկացնել ՀՀ ԱԺ լրացուցիչ ընտրությունների ժամանակ տեղի ունեցած խախտումների կապակցությամբ, երեքշաբթի լրագրողներին տեղեկացրեց ՀԱԿ համակարգող Լևոն Զուրաբյանը:

Խորհրդարանական լրացուցիչ ընտրությունները տեղի են ունեցել հունվարի 10-ին: Թեկնածուների ցուցակում էր նաև «Հայկական ժամանակ» ընդդիմադիր թերթի խմբագիր Նիկոլ Փաշինյանը, ով գտնվում է կալանքի տակ 2008 թ.-ի մարտյան անկարգությունների կապակցությամբ:

«Այս ընտրարշավի հետ կապված մենք դեռ առանձին հանրահավաք անցկացնելու հիմքեր չունենք»,  - հայտարարեց Զուրաբյանը:

Միաժամանակ նա չբացառեց, որ այլ քաղաքական գործընթացների կամ քաղաքական իրավիճակի փոփոխության կապակցությամբ ընդդիմությունը կարող է անցկացնել հանրահավաք մարտի 1-ին նախատեսված ակցիայից ավելի շուտ:

Հայաստանի Կենտրոնական Ընտրական հանձնաժողովի նախնական տվյալների համաձայն՝ հունվարի 10-ին Երևանի 10-րդ ընտրատարածքում Հայաստանի խորհրդարանական լրացուցիչ ընտրություններում հաղթել է «Ազգային միաբանություն» կուսակցության թեկնածու Արա Սիմոնյանը, ով հավաքել էր 7622 ձայն:

Կալանքի տակ գտնվող «Հայկական ժամանակ» ընդդիմադիր թերթի խմբագիր Նիկոլ Փաշինյանի օգտին քվեարկել էր ընտրություններին մասնակցած 13380 ընտրողներից 5053-ը:

Լրացուցիչ ընտրությունները նշանակվել էին, երբ ձեռներեց Խաչատուր Սուքիասյանը, ով 2008թ.-ի նախագահական ընտրությունների ժամանակ սատարել էր ՀՀ նախկին նախագահ Լևոն Տեր-Պետրոսյանին, հրաժարվել էր պատգամավորական մանդատից:-0-