ԵՐԵՎԱՆ, 18 դեկտեմբերի. /Նովոստի-Արմենիա/. Հ. Թումանյանի անվ. Երևանի պետական տիկնիկային թատրոնում երկարատև դադարից հետո 2010 թ.-ի հունվարի երկրորդ կեսին այցելուների առաջ իր դռները կբացի տիկնիկների թանգարանը, ասաց թատրոնի տնօրեն և գեղարվեստական ղեկավար, ՀՀ արվեստների վաստակավոր գործիչ Ռուբեն Բաբայանը:
«Վերջերս մենք ավարտել ենք վերջին ցուցադրատախտակի ձևավորումը, և վերջապես կկատարվի մեր երկար տարիների երազանքը. թատրոնում կբացվի տիկնիկների թանգարանը»,- ուրբաթ մամուլի ասուլիսի ժամանակ ասաց նա:
Պարզաբանելով, որ թանգարանը կրում է թատրոնի հիմնադիրներից մեկի՝ Պավլոս Բորոյանի անունը, ով ժամանակին հասել է թանգարանի պաշտոնական բացմանը, Բաբայանն ասաց, որ թատրոնում հավաքված են ոչ միայն տիկնիկային թատրոնի տիկնիկները, այլև տիկնիկներ, որոնք թատրոնին նվիրել են այլ երկրներից:
«Ընդհանուր առմամբ երկու արտաքին և հինգ ներքին ցուցափեղկերում կցուցադրվի 300 տիկնիկ, տիկնիկների մի մասը պահվում է պահոցներում: Թանգարանում կներկայացվեն նաև տիկնիկների էսքիզներ և թեմատիկ մակետներ»,- պարզաբանեց նա:
Տիկնիկների թանգարանը, որը Երևանի տիկնիկային թատրոնում հիմնադրվել է 1975 թ.-ին, երկար տարիների բարդությունների հետ է բախվել, մասնավորապես, եղել են տիկնիկների գողության ու վաճառքի դեպքեր: 1992թ.-ին թանգարանը դարձյալ բացվել է, 300 տիկնիկ վերականգնվել է «Հայաստան» համահայկական հիմնադրամի միջոցներով, սակայն մնում էր անել ամենակարևորը՝ ցուցադրատախտակների ստեղծումը, որոնցից առաջինը հավաքվել է մայրաքաղաքի քաղաքապետարանի, չորսը՝ Մշակույթի նախարարության, իսկ մնացածը տիկնիկային թատրոնի միջոցներով:
Բաբայանը հայտնեց, որ նման թանգարաններ ամբողջ աշխարհում շատ քիչ են, մասնավորապես, այդպիսի ցուցադրություններ գործում են Մոսվայում, Խարկովում, Պրահայում, Լոնդոնում, ինչպես նաև Վիետնամում և Չինաստանում:
«Մեր թանգարանում ներկայացված են ոչ միայն պարզապես խաղալիք-տիկնիկներ, որոնք անգլերեն doll են կոչվում, այլ բեմական տիկնիկ-կերպարներ (puppet)», - պարզաբանեց նա՝ հավելելով, որ թանգարանում կան նաև ազգային տարազներով տիկնիկներ, որոնք ժամանակին նվիրել է Հնդկաստանի վարչապետ Ինդիրա Գանդին:
Գեղարվեստական ղեկավարի խոսքերով, բեմական տիկնիկների մի մասը հավաքվել է թատրոնի խաղացանկի այն ներկայացումներից, որոնք արդեն չեն ցուցադրվում, իսկ մյուս մասը կազմում են ԽՍՀՄ նախկին տիկնիկավարների աշխատանքները՝ ցուցադրված 1982 թ.-ին Երևանում տեղի ունեցած Անդրկովկասի տիկնիկային թատրոնների առաջին փառատոնի շրջանակներում:
«Սա ողջ Խորհրդային Միության տարածքով տեղափոխվող շարժական ցուցահանդես էր, սակայն մեզ հաջողվեց հասնել նրան, որ աշխատանքների մի մասը մնա մեր թատրոնին որպես նվեր»,- ասաց նա:
Բաբայանն ասաց նաև, որ վերջին վեց տարում թանգարանի ղեկավարությունը Մշակույթի նախարարության միջոցով տիկնիկների փոխանակում է կատարում այլ երկրների հետ:
«Մասնավորապես, մենք ունենք անգլիական ավանդական Punch տիկնիկը (իտալական Pulcinella-ի աղավաղված Punchinello կրճատված տարբերակը,— անգլիական ժողովրդական տիկնիկային թատրոնի կերպար «Նովոստի-Արմենիա»), կան նաև ղազախական, բուլղարական, չինական և նորզելանդական տիկնիկներ»,- պարզաբանեց Բաբայանը: -0-
