Հայաստանն առայժմ պատրաստ չէ արդյունավետ կերպով դիմակայելու ավերիչ երկրաշարժերին
![Հայաստանն առայժմ պատրաստ չէ արդյունավետ կերպով դիմակայելու ավերիչ երկրաշարժերին Հայաստանն առայժմ պատրաստ չէ արդյունավետ կերպով դիմակայելու ավերիչ երկրաշարժերին](/upload/iblock/954/f3f3nhj8e31hb7pu6iwu3eciw3r3stya.jpg)
Հայաստանն առայժմ պատրաստ չէ արդյունավետ կերպով դիմակայելու 8-10 բալ ուժգնությամբ ավերիչ երկրաշարժերին և խուսափելու մեծ մարդկային զոհերից, «Նովոստի» մամուլի կենտրոնում տված ասուլիսի ժամանակ հայտարարեց ՀՀ սեյսմիկ պաշտպանության ազգային ծառայության պետ Ալվարո Անտոնյանը:
«Եթե Հայաստանում 1988թ.-ի երկրաշարժի մասշտաբի աղետ կրկնվի, ապա մեզ չի հաջողվի խուսափել մեծ կորուստներից»,- ասաց նա:
Նրա խոսքով, ներկայում Հայաստանում իրականացվում է ոչ այնքան ճիշտ քաղաքաշինական քաղաքականություն:
«Երևանի կենտրոնում կառուցվող նորակառույցներն ինքնին սեյսմակայուն են, սակայն 8-10 բալ երկրաշարժի դեպքում վտանգ կա, որ դրանք գլխիվայր շուռ կգան»,- ասաց Անտոնյանը:
Հայաստանի սեյսմիկ պաշտպանության ազգային ծառայության պետն ընդգծեց, որ նորակառույցների մեծ մասը գտնվում են մասնավոր տիրություն, և շինարարությամբ զբաղվող բոլոր ընկերությունները չէ, որ դիմում են սեյսմիկ ծառայություններին շենքերի սեյսմակայունությունը որոշելու համար, և այս առումով Հայաստանում խնդիր կա:
Նրա նշեց, որ միշտ կա մեծ սեյսմիկ վտանգ խիտ բնակեցված քաղաքներում, և արդյունավետ դիմակայելու համար անհրաժեշտ է կառավարման մարմինների արդյունավետ աշխատանք ու բնակչության իրազեկության բարձր մակարդակ:
«Եթե 1988թ.-ին բնակչության իրազեկության մակարդակը նորմալ վիճակում լիներ, ապա զոհերի թիվը 20-30 տոկոսով պակաս կլիներ»,- ասաց Անտոնյանը՝ հավելելով, որ ներկայում Հայաստանի սեյսմիկ ծառայությունները աշխատում են բնակչության իրազեկման բարձրացման ուղղությամբ:
1988թ. դեկտեմբերի 7-ին Հայաստանում տեղի ունեցավ ավերիչ երկրաշարժ։ Աղետը հիմնովին ավերեց Հայաստանի հյուսիսում գտնվող երկու քաղաք՝ Սպիտակն ու Լենինականը (այժմյան Գյումրին), ավելի քան հարյուր գյուղ։ Եվս մի քանի քաղաքներ ավերվեցին մասամբ։
Երկրաշարժի 6 բալանոց գոտին ընդգրկել էր շուրջ 30.000 քառակուսի կիլոմետր տարածք, ստորգետնյա ցնցումները զգացվել էին Երևանում և Թբիլիսիում։
Երկրաշարժի էպիկենտրոնում՝ Սպիտակ քաղաքում, նրա ուժգնությունը, գնահատելով 12 բալանոց սանդղակով, կախված շինությունների ավերվածության աստիճանից՝ հասել է 10 բալի:
Այդ օրը, ըստ պաշտոնական տվյալների, զոհվեց 25 հազ. մարդ, 140 հազարը դարձան հաշմանդամներ, իսկ կես միլիոն մարդ մնաց անօթևան։ -0-