Հայաստանը շահագրգռված է ԱՄՆ-ի հետ հարաբերությունների խորացմամբ. ՀՀ նախագահ
![Հայաստանը շահագրգռված է ԱՄՆ-ի հետ հարաբերությունների խորացմամբ. ՀՀ նախագահ Հայաստանը շահագրգռված է ԱՄՆ-ի հետ հարաբերությունների խորացմամբ. ՀՀ նախագահ](/upload/iblock/e70/r0nbv97e0hbycj8wea5hzxvvdk8ad104.jpg)
Հայաստանը շահագրգռված է ԱՄՆ-ի հետ հարաբերությունների խորացմամբ, հինգշաբթի հայտարարեց ՀՀ նախագահ Սերժ Սարգսյանը ԱՄՆ պաշտպանության փոխնախարարի տեղակալ Սելեսթա Վոլանդերի հետ հանդիպման ժամանակ:
«Հայ-ամերիկյան հարաբերություններն ավանդաբար կրում են ջերմ, բարեկամական բնույթ, և մենք շահագրգռված ենք դրանց հետագա խորացմամբ»,- նախագահի խոսքերը մեջբերեցին պետության ղեկավարի մամուլի ծառայությունից:
Սարգսյանը հավելեց, որ Հայաստանը բարձր է գնահատում երկրի անկախացումից ի վեր Միացյալ Նահանգների կառավարության կողմից ցուցաբերվող օժանդակությունը և տարածաշրջանում կայունության ու խաղաղության հաստատմանն ու տարածաշրջանային խնդիրների լուծմանն ուղղված ԱՄՆ ջանքերը:
Իր հերթին ԱՄՆ պաշտպանական գերատեսչության ներկայացուցիչն ասել է, որ այցի ընթացքում նպատակ ունի ավելի լավ հասկանալ պաշտպանական ոլորտում Հայաստանի առաջնահերթությունները:
Նշելով, որ իր երկիրը բարձր է գնահատում Հայաստանի մասնակցությունը տարբեր խաղաղապահ առաքելություններին` նա ասել է, որ այսօր եղել է ՀՀ զինված ուժերի խաղաղապահ բրիգադում և տպավորված է հայ զինծառայողների կարողություններով:
Նախագահ Սարգսյանը կարևորել է միջազգային խաղաղապահ գործունեությանը Հայաստանի մասնակցությունը և ասել է, որ Հայաստանը պարտավոր է և ունակ է իր ներդրումն ունենալ միջազգային անվտանգության ամրապնդման գործում:
Հանրապետության նախագահը և ամերիկյան վարչակազմի պաշտոնյան արդյունավետ են գնահատել պաշտպանական ոլորտում երկու երկրների համագործակցությունը, իրականացված ծրագրերը և նշել են, որ Հայաստանը լավագույնս է օգտագործել եղած հնարավորությունները: Նախագահ Սարգսյանն ասել է, որ այդ հարաբերությունները զարգացման ու ընդլայնման մեծ ներուժ ունեն:
Զրուցակիցները մտքեր են փոխանակել նաև տարածաշրջանային զարգացումների և խնդիրների վերաբերյալ:-0-