Այսօր Երևանում հայկական եկեղեցիների պահպանության ուղղությամբ վրացական իշխանությունների անգործության դեմ բողոքի ակցիա անցկացվեց
ԵՐԵՎԱՆ, 24 նոյեմբերի. /Նովոստի-Արմենիա/. Երեքշաբթի Երևանում հայկական եկեղեցիների և մշակույթի հուշարձանների պահպանության ուղղությամբ վրացական իշխանությունների անգործության դեմ բողոքի ակցիա է անցկացրել հայ երիտասարդությունը:
«Մեր ակցիան ուղղված է ոչ թե Վրաստանի ժողովրդի, այլ վրացական իշխանությունների ու եկեղեցու դեմ, այն ոտնձգության դեմ, որ նրանց կողմից կատարվում է Հայ Առաքելական եկեղեցու և հայկական մշակույթի հանդեպ: Այս ակցիայի հիմնական նպատակն այն է, որ կոչ անենք վրացական իշխանություններին ու վրացական եկեղեցուն՝ ետ կանգնել անցկացվող քաղաքականությունից, և մենք փորձում ենք այս ակցիայի օգնությամբ տեղի ունեցող գործընթացների վրա հրավիրել վրացական հասարակության ուշադրությունը»,- «Նովոստի-Արմենիա» գործակալությանը հայտնեց ակցիայի կազմակերպիչներից մեկը՝ «Երիտասարդություն» հասարակական կազմակերպության նախագահ Գևորգ Մկրտչյանը:
Թբիլիսիում ավերվում է 1356 թ.-ին կառուցված Սբ. Գևորգ հայկական եկեղեցու շենքը: Հայաստանի Գերագույն հոգևոր խորհուրդը կոչ է արել Վրաստանի իշխանություններին ու Վրաց ուղղափառ եկեղեցուն՝ անհապաղ քայլեր ձեռնարկել Հայ Առաքելական Եկեղեցու Վիրահայոց թեմին իրավաբանական անձի կարգավիճակ տրամադրելու ուղղությամբ, վերադարձնել հայ եկեղեցիները և հարգել ու պահպանել հայ ժողովրդի մշակութային արժեքները՝ վիրահայերի ազգային-եկեղեցական կյանքի նորմալ կազմակերպման և հայկական սրբությունների հուսալի պահպանության նպատակով:
Կազմակերպիչների գնահատականներով՝ ակցիային մասնակցել է շուրջ 1000 մարդ տարբեր հասարակական կազմակերպություններից և ուսանողական խորհուրդներից:
«Ոչ անտարբերությանը», «Վերադարձրեք մեր եկեղեցիները», «Վրացիներ, դուք քրիստոնյա եք» կարգախոսերով ակցիաների մասնակցիները երթով անցան Հայաստանում Վրաստանի դեսպանատան մոտով և դեսպանին հանձնեցին Վրաստանի իշխանություններին ու վրացական եկեղեցուն հասցեագրված ուղերձը:
Համանման ուղերձ կազմակերպիչները մտադիր էին փոխանցել ՄԱԿ-ում հայկական ներկայացուցչությանը, սակայն քաղաքապետարանն արգելել է երիտասարդության երթը Երևանում ՄԱԿ-ի շենքի մոտ:-0-
