ԵՐԵՎԱՆ, 24 նոյեմբերի. /Նովոստի-Արմենիա/. Հայկական կողմն անհրաժեշտ է համարում, որպեսզի ստորագրված հայ-թուրքական արձանագրությունները վավերացվեն ողջամիտ ժամկետներում, ասել է ՀՀ ԱԺ խոսնակ Հովիկ Աբրահամյանը Թուրքիայի ազգային մեծ ժողովի նախագահ Մեհմեթ Ալի Շահինի հետ հանդիպման ժամանակ:
Ինչպես հաղորդում է ՀՀ ԱԺ հասարակայնության հետ կապերի վարչությունը, հանդիպումը տեղի է ունեցել նախօրեին Մոսկվայում՝ Սևծովյան տնտեսական համագործակցության Խորհրդարանական վեհաժողովի լիագումար նիստի շրջանակներում:
Երկու խորհրդարանների ղեկավարները բարձր են գնահատել Հայաստանի և Թուրքիայի նախագահների համարձակ համատեղ աշխատանքը և համաձայնել, որ դրա շնորհիվ պարարտ հող է ստեղծվել երկու հարևան ժողովուրդների միջև բնականոն հարաբերություններ հաստատելու համար:
Այդ համատեքստում նրանք համաձայնել են, որ անհրաժեշտ է առաջին հերթին խրախուսել մարդկային ուղղակի շփումները, ինչպես նաև փորձել կապեր ստեղծել երկու երկրների խորհրդարանների միջև:
Հանդիպման ընթացքում զրուցակիցները միմյանց փոխադարձաբար ներկայացրել են իրենց երկրների խորհրդարանների կառուցվածքի և գործունեության առանձնահատկությունները: Նրանք տեսակետներ են փոխանակել առանց նախապայմանների երկկողմ հարաբերություններ հաստատելու գործընթացի շուրջ:
Հայաստանն ու Թուրքիան հոկտեմբերի 10-ին Ցյուրիխում ստորագրեցին դիվանագիտական հարաբերությունների կարգավորման մասին արձանագրությունները:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ:--0—
