Հայտնի հայ տենոր Վաննո Թադեոն համերգ կունենա Երևանում
![Հայտնի հայ տենոր Վաննո Թադեոն համերգ կունենա Երևանում Հայտնի հայ տենոր Վաննո Թադեոն համերգ կունենա Երևանում](/upload/iblock/96b/rcsgrlhceea2537ke33zod7mrta5mp7e.jpg)
Հայտնի հայ տենոր, մի շարք եվրոպական օպերաների մենակատար, իսպանաբնակ Վաննո Թադեոն (Վահրամ Թադևոսյան) դեկտեմբերի 14-ին համերգ կունենա Երևանում:
«Այս տարի Հայաստանում իմ հյուրախաղերը նվիրված են մեծանուն հայ կոմպոզիտոր Կոմիտասի 140-ամյակին և Հայաստանի անկախության 18-ամյակին: Հաշվի առնելով այս ամենը՝ ծրագրի երկացանկը հագեցած է հայկական դասական ստեղծագործություններով», - ասաց Թադեոն:
Չնայած, որ ծրագրում գերակշռում է հայկական դասական, այդ թվում նաև գործիքային երաժշտությունը, տենորի խոսքերով՝ ծրագրի երկրորդ մասում կկատարվեն նաև ակադեմիական արիաներ համաշխարհային դասական երաժշտական ստեղծագործություններից, օրինակ՝ արիաներ Ջակոմո Պուչինիի «Տոսկա», Վերդիի «Ռիգոլետո» ստեղծագործություններից:
Թադեոն ասաց, որ դասական երաժշտության քարոզչությունը և ոչ միայն մայրաքաղաքի, այլև հանրապետության մարզերի շնորհալի երեխաներին աջակցությունը իր առաջնահերթ խնդիրներից են:
«Ոգևորությունը, որով մարզերի ունկնդիրներն ընդունեցին իմ կատարումը, մասնավորապես, Գյումրիում, որտեղ ես ելույթ եմ ունեցել նախորդ տարի և Վանաձորում, որտեղ արդեն հանդես եմ եկել, ցայտուն արտահայտում է դասական արվեստի նկատմամբ լսարանի սերն ու ձգտումը», - նշեց նա:
Այս ամենը հաշվի առնելով՝ երգիչը նշեց, որ մտադիր է վարպետության դասեր անցկացնել այն քաղաքներում, որոնք կայցելի հյուրախաղերի շրջանակներում, մասնավորապես, Գյումրիում և Վանաձորում:
Տենորի խոսքերով՝ մինի հյուրախաղերի շրջանակներում ինքն արդեն ելույթ է ունեցել Վանաձորում, իսկ նոյեմբերի 28-ին ծրագրված է նրա համերգը Գյումրիում:
Ներկայացնելով սեփական ծրագրերը՝ Թադեոն նշեց, որ ծրագրում է դուետով հանդես գալ էստրադային կատարող Արման Էլբերտի հետ:
«Բացառված չէ, որ մեր համատեղ համերգը տեղի ունենա ՄՀՀ-ում, և ծրագրում կներառվեն Էլթոն Ջոնի ստեղծագործությունները, որոնք հնարավոր է դասել դասական ստեղծագործությունների շարքին», - ասաց նա:
1996 թ.-ին հայտնի տենոր Վաննո Թադեոն հրավիրվել է Բարսելոնա և ամենայն Հայոց Կաթողիկոս Գարեգին Ա-ի աջակցությամբ մասնակցել Ֆ. Վինիասի անվան միջազգային մրցույթին, արժանացել դիպլոմի և Ջ. Վերդիի անվան մրցանակի: Վերջին ութ տարին Վաննո Թադեոն ապրում է Իսպանիայում՝ ելույթ ունենալով եվրոպական քաղաքների բեմերում:-0-