ՀՀ ԱԳՆ պնդում է, որ հայ-թուրքական արձանագրություններում նախապայմաններ չկան
![ՀՀ ԱԳՆ պնդում է, որ հայ-թուրքական արձանագրություններում նախապայմաններ չկան ՀՀ ԱԳՆ պնդում է, որ հայ-թուրքական արձանագրություններում նախապայմաններ չկան](/upload/iblock/3f9/hvobdvyn5b6c1ibogiwsi3ds7v7x1fnl.jpg)
Հայաստանի ԱԳՆ լրատվամիջոցների հետ կապի բաժնի ղեկավար Տիգրան Բալայանն ընդգծել է, որ հայ-թուրքական ստորագրված արձանագրություններում երկկողմ հարաբերությունների հաստատման համար որևիցե նախապայման չկա, և հայկական կողմն առաջնորդվելու է այդ փաստով:
Այս մասին Բալայանն ասել է՝ մեկնաբանելով պնդումներն այն մասին, թե Թուրքիայի ԱԳՆ ղեկավար Ահմեդ Դավութօղլուն իր ելույթներում իբրև թե հնչեցրել է նախապայմաններ երկկողմ հարաբերությունների նորմալացման համար:
«Հայ-թուրքական համաձայնություններն արտացոլված են հոկտեմբերի 10-ին Ցյուրիխում ստորագրված արձանագրություններում, որտեղ որևիցե նախապայման չկա, և մենք առաջ ենք ընթանալու արձանագրությունների դրույթների հետ համահունչ»,- Բալայանի խոսքերը մեջբերեցին ԱԳՆ մամուլի ծառայությունից:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Ստորագրումից հետո երկու ամսվա ընթացքում փաստաթղթերը պետք է ներկայացվեն խորհրդարաններին վավերացման համար:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ -0-