Հայաստանի ԱԱԾ-ն տեղեկացնում է ադրբեջանցի լրտեսի ձերբակալության մասին
ԵՐԵՎԱՆ, 21 հոկտեմբերի. /Նովոստի-Արմենիա/. Հայաստանի Ազգային անվտանգության ծառայության մարմինների կողմից իրականացված օպերատիվ-հետախուզական և քննչական գործողությունների արդյունքում կալանավորվել է ՀՀ քաղաքացի Գևորգ Հայրապետյանը, ով համագործակցել է ադրբեջանական հատուկ ծառայությունների հետ, տեղեկացնում է ԱԱԾ մամուլի ծառայությունը։
«Հայրապետյանը հանդիսանում է նախկին զինծառայող, պահեստազորի փոխգնդապետ, 2007թ-ին արձակվել է ՀՀ ԶՈՒ-ից` զինվորական և ծառայողական կարգապահության կանոնների կոպիտ խախտման համար»,- ասվում է հաղորդագրությունում։
Հայրապետյանին առաջադրվել է մեղադրանք ՀՀ Քրեական օրենսգրքի 299 հոդվածի 1-ին մասով` պետական դավաճանություն լրտեսության ձևով: Նույն գործով կալանավորվել է նաև Հայրապետյանի և ադրբեջանական հատուկ ծառայությունների միջև կապ իրականացնող օտարերկրյա քաղաքացի:
Քրեական գործով նախաքննությունը վարում է ՀՀ ազգային անվտանգության ծառայության քննչական վարչությունը: -0-
