Հայ ծանրորդները երկու «ոսկե» և երկու «արծաթե» մեդալներ նվաճեցին Եվրոպայի երիտասարդական առաջնությունում

ԵՐԵՎԱՆ, 19 հոկտեմբերի. /Նովոստի-Արմենիա/. Հայ ծանրորդները Լեհաստանի Վլադիսլավովո քաղաքում անցկացված մինչև 23 տարեկանների Եվրոպայի երիտասարդական առաջնության ժամանակ երկու «ոսկե» և երկու «արծաթե» մեդալ նվաճեցին:

Ինչպես ասվում է սպորտի և երիտասարդության հարցերի նախարարության պաշտոնական կայքում տեղակայված հաղորդագրության մեջ, 94  կգ քաշային կարգում հանդես եկող հայաստանցի Վարդան Դավթյանը երկամարտի 359 կգ արդյունքով նվաճել է արծաթե մեդալ: Պոկում վարժությունում նա գրանցել է 160 կգ արդյունք, իսկ հրումում` 199 կգ արդյունք` նվաճելով փոքր ոսկի:

Գերծանր քաշային կարգում հանդես եկող Ռուբեն Ալեքսանյանը երկամարտի 416 կգ արդյունքով նվաճել է Եվրոպայի չեմպիոնի կոչումը: Նա պոկում վարժությունում գրանցել է 181 կգ արդյունք, իսկ հրումում` 235 կգ արդյունք:

Մինչև 77 կգ քաշային կարգում  Աղասի Աղասյանը երկամարտի 337 կգ արդյունքով նվաճել է Եվրոպայի չեմպիոնի կոչումը: Նա պոկում վարժությունում գրանցել է 150 կգ արդյունք, իսկ  հրումում` 187 կգ արդյունք:

Մինչև 85 կգ քաշային կարգում Աղվան Մելիքյանը երկամարտի 354 կգ (160+194) արդյունքով նվաճել է արծաթե մեդալ: Նույն քաշային կարգում Արամ Անդրիկյանը 349 կգ (156+193) արդյունքով գրավել է 4-րդ տեղը:

Հայաստանի հավաքականը Վլադիսլավովո քաղաքում ներկայացնում էին 9 ծանրորդներ. Վարդան Դավթյանը, Ռուբեն Ալեքսանյանը, Աղասի Աղասանյանը, Աղվան Մելիքյանը, Վանիկ Ավետիսյանը, Սմբատ Մարգարյանը, Դավիթ Մուրադյանը, Արամ Անդրիկյանը, Արայիկ Միրզոյանը: -0-