Հայաստանը ձգտում է տարածաշրջանում անվտանգություն ապահովող երկիր դառնալ. քաղաքագետ

Հայաստանը տարածաշրջանային մակարդակում փորձում է իր տեղը գտնել՝ որպես տարածաշրջանում անվտանգություն ապահովող երկիր, ասաց Երևանի պետական համալսարանի պրոռեկտորի տեղակալ, քաղաքագետ Ալեքսանդր Մարկարովը:

«Իսկ գլոբալ մակարդակում Հայաստանը ձգտում է իրեն դրսևորել որպես հուսալի և կանխատեսելի գործընկեր, ում հետ հնարավոր է աշխատել», - ասաց նա հինգշաբթի «Նովոստի» միջազգային մամուլի կենտրոնում:

Մարկարովի խոսքերով՝ վերջին երկու շաբաթվա իրադարձությունները, այդ թվում նաև հայ-թուրքական արձանագրությունների ստորագրումը, Քիշնևում կայացած ԱՊՀ պետությունների ղեկավարների հանդիպումը, ինչպես նաև ՀՀ նախագահ Սերժ Սարգսյանի և նրա թուրք գործընկեր Աբդուլա Գյուլի հանդիպումը վկայում են այն մասին, որ տարածաշրջանն իրեն դրսևորի ոչ թե որպես անվտանգության սպառող, այլ որպես մատակարար:

«Ոչ ոքի պետք չէ անկայուն տարածաշրջան, և տարածաշրջանային մակարդակում տեղի ունեցող իրադարձությունները պետք է ապահովեն տարածաշրջանի անվտանգությունը: Աշխարհի երկրները մտադիր չեն գործ ունենալ մի տարածաշրջանի հետ, որտեղ անվտանգության հետ կապված խնդիրներ կան», - ընդգծեց նա:

Այս կապակցությամբ քաղաքագետն ավելացրեց, որ վերջին տարվա ընթացքում ստեղծվել է բավականին հետաքրքիր իրավիճակ, երբ աշխարհի գլոբալ խաղացողների շահերը սկսում են կենտրոնանալ և համընկնել տարածաշրջանի շահերի հետ:

«Այս ամենը բարենպաստ պայմաններ է ստեղծում՝ համապատասխան միջոցառումներ և քաղաքականություններ իրագործելու համար», - փաստեց Մարկարովը:-0-