ՀՀ նախագահ Սերժ Սարգսյանի ավտոշարասյունն արդեն Բուրսայի Ալմիրա հյուրանոցի մոտ է

ԲՈՒՐՍԱ (Թուրքիա), 14 հոկտեմբերի. /Նովոստի-Արմենիա/. ՀՀ նախագահ Սերժ Սարգսյանի ավտոշարասյունն արդեն Բուրսայի Ալմիրա հյուրանոցի մոտ է:

ՀՀ նախագահ Սերժ Սարգսյանը ժամանել է Բուրսա՝ Աբդուլա Գյուլի հետ Հայաստանի և Թուրքիայի հավաքականների ֆուտբոլային հանդիպումը դիտելու նպատակով: Նախագահ Սարգսյանի հետ Թուրքիա են մեկնել նաև արտգործնախարար Էդուարդ Նալբանդյանը, փոխարտգործնախարարներ Արման Կիրակոսյանը և Շավարշ Քոչարյանը, Նախագահի աշխատակազմի և Արտաքին գործերի նախարարության բարձրաստիճան այլ պետական ծառայողներ: Նախագահ Սարգսյանին ուղեկցում են նաև մի քանի տասնյակ հայ լրագրողներ:

Նախագահի շարասյանը սպասում են հյուրանոցի մոտ, որտեղ պետք  անցկացնեն նեղ և ընդլայնված ձևաչափով հանդիպումներ, որից հետո տեղի կունենա ճեպազրույց լրագրողների համար:

Քաղաքում ձեռնարկվել են անվտանգության բոլոր միջոցները, հյուրանոցը շրջապատել են ոստիկանները: Քաղաքում իրավիճակը հանդարտ է, ոչ մի հանրահավաք կամ բողոքի ցույց չկա, փողոցներում ազատ է երթևեկությունը:

Բուրսայում Նախագահ Սերժ Սարգսյանը նախ կայցելի մեր ազգային հավաքականի ֆուտբոլիստներին` քաջալերելու նրանց հանդիպումից առաջ: Նախագահ Սարգսյանը Բուրսայում առանձնազրույց կունենա Թուրքիայի Նախագահի հետ: Կլինի նաև հանդիպում ընդլայնված կազմով: Բուրսայում Թուրքիայի Նախագահի անունից Նախագահ Սարգսյանի պատվին կտրվի ճաշ և կկազմակերպվի ընդունելություն: Նախագահ Սարգսյանի ղեկավարած պատվիրակությունը ֆուտբոլային խաղից հետո կվերադառնա Երևան:

Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Հայ-թուրքական սահմանը փակ է 1993 թ.-ից՝ պաշտոնական Անկարայի նախաձեռնությամբ, երկու երկրների միջև բացակայում են դիվանագիտական հարաբերությունները։

Թուրքիան մի շարք նախապայմաններ է առաջ քաշում՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչումից հրաժարվելը, Հայաստանի կողմից Թուրքիայի սահմանների ճանաչումը։ Երևանում, իր հերթին, հայտարարում են Թուրքիայի հետ առանց նախապայմանների դիվանագիտական հարաբերությունների հաստատման պատրաստակամության մասին։--0--