Քաղաքացիական ծառայության համակարգում բարեփոխումների ծրագրի մշակման աշխատանքները կավարտվեն 2010 թ.-ի հունիսին
Քաղաքացիական ծառայության համակարգում բարեփոխումների ծրագրի մշակման աշխատանքները կավարտվեն 2010 թ.-ի հունիսին: Նման որոշում կայացվել է Միջգերատեսչական աշխատանքային խմբի` չորեքշաբթի կայացած նիստում, որը վարել է Ազգային անվտանգության խորհրդի քարտուղար Արթուր Բաղդասարյանը, հայտնում է ՀՀ Ազգային անվտանգության խորհրդի մամուլի ծառայությունը:
Նիստին որոշվել է ձեռնամուխ լինել ԵՄ չափանիշներին համապատասխան բարեփոխումների ծրագրի մշակմանը:
«Հայաստան-Եվրամիություն» համագործակցության ծրագրի շրջանակում Հայաստանում կիրականացվեն քաղաքացիական ծառայության համակարգի բարեփոխումներ:
Ծրագրի նպատակն է` Եվրամիության անդամ պետությունների և Հայաստանի քաղաքացիական ծառայության համակարգի ներդաշնակեցումը, համագործակցության ցանցի ձևավորումը, համագործակցության նոր մեխանիզմների և շրջանակների զարգացումը:
Արթուր Բաղդասարյանը նշել է, որ բարեփոխումները ենթադրում են քաղաքացիական ծառայողների էթիկայի կանոնագրքի և ուսուցման հայեցակարգի մշակում և ընդունում, քաղծառայության համակարգում աշխատանքի ընդունման մեխանիզմների ու ընթացակարգերի բարելավում, պետական ծառայողների վերապատրաստում և վերաորակավորում:
Արդյունքում` Հայաստանում Եվրամիության չափանիշներով կստեղծվի պետական կառավարման` օրենքներով և իրավական նորմերով կարգավորվող միասնական համակարգ:-0-
