Հայաստանի և Լիբանանի ղեկավարները գոհ են երկրների միջև բարեկամական հարաբերությունների մակարդակից
Հայաստանի և Լիբանանի նախագահներ Սերժ Սարգսյանն ու Միշել Սուլեյմանը երեքշաբթի կայացած հեռախոսազրույցի ընթացքում բարձր են գնահատել երկու երկրների միջև առկա բարեկամական սերտ հարաբերությունները:
Ինչպես հայտնում է երկրի ղեկավարի մամուլի ծառայությունը, հեռախոսազրույցը տեղի է ունեցել ՀՀ նախագահի՝ հոկտեմբերի 1-ին մեկնարկող համահայկական շրջայցի նախաշեմին:
Ընդ որում Լիբանանի նախագահը մեկ անգամ ևս ընդգծել է Լիբանանի ժողովրդի առանձնահատուկ համակրանքը հայ ժողովրդի հանդեպ:
«Սերժ Սարգսյանն ու Միշել Սուլեյմանը բարձր են գնահատել երկու երկրների միջև առկա բարեկամական սերտ հարաբերությունները` ընդգծելով լիբանանահայ համայնքի ծանրակշիռ ներդրումը հայ-լիբանանյան բարեկամության զարգացման գործում»,- ասվում է հաղորդագրության մեջ:
Նախագահները մտքեր են փոխանակել նաև երկկողմ հարաբերությունների զարգացման հեռանկարների շուրջ:
Հոկտեմբերի սկզբին նախագահ Սերժ Սարգսյանը կսկսի համահայկական մեկշաբաթյա շրջայցը՝ հայ-թուրքական հարաբերությունների նորմալացման հարցի վերաբերյալ հայկական սփյուռքի կարծիքի ու մոտեցումների հետ ծանոթանալու համար: Ուղևորության շրջանակներում ՀՀ նախագահը կայցելի Նյու Յորք, Փարիզ, Լոս Անջելես, Բեյրութ և Դոնի Ռոստով քաղաքները, որտեղ կկայանան տարածաշրջանային հանդիպումներ:—0--
