ԵԱՀԿ Մինսկի խմբի համանախագահները Երևան կժամանեն հոկտեմբերի 1-ին
Ղարաբաղյան հակամարտության կարգավորման հարցով ԵԱՀԿ Մինսկի խմբի համանախագահները Երևան կժամանեն հոկտեմբերի 1-ին, ՀՀ Տավուշի մարզում լրագրողներին է տեղեկացրել ԵԱՀԿ նախագահի անձնական ներկայացուցիչ, դեսպան Անջեյ Կասպրչիկը:
Կասպրչիկը երեքշաբթի մասնակցել է հայ-ադրբեջանական շփման գծում անցկացված դիտարկմանը:
Նրա խոսքերով, համանախագահները կայցելեն նաև Ստեփանակերտ և Բաքու:
Կասպրչիկը նշել է, որ համանախագահների այցի նպատակը Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հերթական հանդիպումը նախապատրաստելն է:
Միաժամանակ դիվանագետը ընդգծել է, որ ընթացող բանակցությունները հանդարտության կարիք ունեն և յուրաքանչյուր կրակոց, փոխհրաձգություն (շփման գծում), ինչպես նաև կորուստներ կարող են ազդել բանակցությունների մթնոլորտի վրա:
«Կարծում եմ, որ վերևից հրաման է տրվել զերծ մնալ կրակոցներից, պատասխան հարվածից, նույնիսկ եթե հակառակորդը որևէ միջոցներ է ձեռնարկում», - ասել է Կասպրչիկն՝ ավելացնելով, որ բանակցությունների ակտիվացումը կարող է նպաստել շփման գծում իրավիճակի հանդարտեցմանը:-0-