Հայաստանի նախագահի այցը Թուրքիա, ընթացիկ տարվա հոկտեմբերին կայանալիք ֆուտբոլային հանդիպմանը կարող է տեղի ունենալ երկրների միջև դիվանագիտական հարաբերությունների հաստատմանը վերաբերող արձանագրություններից մեկի ստորագրման շրջանակներում, երեքշաբթի լրագրողներին հայտնեց ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանը։
Երկուշաբթի երեկոյան Թուրքիայի և Հայաստանի արտգործնախարությունները, ինչպես նաև Շվեյցարիայի Արտաքին գործերի դեպարտամենտը հայտարարեցին, որ Հայաստանի հետ բանակցություններում, որոնք տարվում են Շվեյցարիայի միջնորդությամբ, պայմանավորվածություն է ձեռք բերվել «Դիվանագիտական հարաբերություններ հաստատելու մասին արձանագրության» և «Երկկողմ հարաբերությունների զարգացման մասին արձանագրության» ստորագրմանը վերաբերող «ներքաղաքական խորհրդատվությունների» սկզբի մասին: Քաղաքական խորհրդատվությունները ծրագրվում է ավարտել վեց շաբաթվա ընթացքում, որից հետո կստորագրվի երկու արձանագրություն, որոնք կհանձնվեն երկու երկրի խորհրդարանների հաստատմանը:
Ինչպես պարզաբանեց Սաֆրաստյանը, համաձայն ««Արձանագրություն երկու երկրների միջև դիվանագիտական հարաբերություններ հաստատելու մասին» և «Արձանագրություն երկկողմ հարաբերությունների զարգացման մասին» արձանագրությունների ստորագրման բանակցային գործընթացի ավարտի ժամկետները համընկնում են Թուրքիայում ֆուտբոլային խաղի ամսաթվի հետ։
«Չի բացառվում, որ եթե ամեն ինչ ընթանա ծրագրվածի պես, այդ արձանագրություններից մեկը ստորագրվի նախագահի՝ Թուրքիա նախատեսած այցի ընթացքում»,- կարծում է Սաֆրաստյանը։
Ավելի վաղ Սարգսյանը բազմիցս հայտարարել է, որ կմեկնի Թուրքիա Հայաստանի և Թուրքիայի ազգային հավաքականների միջև ֆուտբոլային խաղը դիտելու, եթե միջպետական սահմանը բացվի կամ կողմերը քայլեր ձեռնարկեն այդ ուղղությամբ։
Հայաստանի և Թուրքիայի ազգային հավաքականների հանդիպումը, որին հրավիրված է Հայաստանի նախագահ Սերժ Սարգսյանը, տեղի կունենա հոկտեմբերի 14-ին Բուրսա քաղաքում։
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
