Հայաստանում ՃՏՊ-ների թիվը մոտակա հինգ տարվա ընթացքում ծրագրվում է կրճատել 10 տոկոսով. ՀՀ տրանսպորտի և կապի նախարարություն

ԵՐԵՎԱՆ, 21 օգոստոսի. /Նովոստի-Արմենիա/. ՀՀ կառավարության կողմից ընդունված ռազմավարության շրջանակներում, Հայաստանում ճանապարհատրանսպորտային պատահարների թիվը մոտակա հինգ տարվա ընթացքում ծրագրվում է կրճատել 10 տոկոսով, ուրբաթ «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ ասաց ՀՀ տրանսպորտի և կապի նախարարի առաջին տեղակալ Հրանտ Բեգլարյանը:

«Վերջին հինգ տարվա ընթացքում զգալիորեն ավելացել է ճանապարհատրանսպորտային պատահարների թիվը: 2008թ.-ին գրանցվել է 2202 պատահար, ինչի հետևանքով զոհվել է 407 և վիրավորվել 3125 մարդ», - ասաց փոխնախարարը:

Բեգլարյանի խոսքերով, դա շատ բարձր ցուցանիշ է:

Նա նշեց, որ հաշվի առնելով այն, որ վերջին հինգ տարվա ընթացքում ճանապարհատրանսպորտային պատահարների թիվն ամեն տարի աճում է 10 տոկոսով՝ կառավարությունը սկսել է մշակել Հայաստանի ճանապարհային երթևեկության անվտանգության ազգային ռազմավարությունը:

«Մենք կոնկրետ նպատակ ունենք՝ մոտակա հինգ տարվա ընթացքում կրճատել պատահարների թիվը 10 տոկոսով», - ասաց Բեգլարյանը՝ նշելով, որ այս նպատակի համար լուրջ միջոցառումներ են անհրաժեշտ:

Նրա խոսքերով, այդ միջոցառումներից մեկը ամրագոտիների օգտագործումն է, ինչը, սակայն, հարյուրավոր քայլերից մեկն է:

«Ծրագրվում է նաև ստեղծել Ճանապարհային անվտանգության ազգային խորհուրդ, որը կգլխավորի ՀՀ վարչապետը: Խորհրդի կազմում կընդգրկվեն բոլոր շահագրգիռ գերատեսչությունների ղեկավարները, հասարակական կազմակերպությունների ներկայացուցիչները», - տեղեկացրեց Բեգլարյանը:-0-