Հայկական ընդդիմությունը համաներմամբ բոլոր «քաղբանտարկյալների» ազատում է ակնկալում

Հայ ազգային կոնգրեսը մարտյան անկարգությունների քրեական գործի շրջանակներում բոլոր «քաղբանտարկյալների» ազատում է ակնկալում համաներմամբ։

Ինչպես երեքշաբթի լրագրողներին հայտնեց ընդդիմադիր ՀԱԿ-ի անդամ, իրավապաշտպան Վարդան Հարությունյանը, հայկական բանտերում է գտնվում 21 «քաղբանտարկյալ», որոնց վրա համաներումը չի տարածվել։

«Այսօր մենք նշում ենք «քաղբանտարկյալի» օրը, և մեծ ափսոսանքով պետք է ասեմ, որ Հայաստանում ներկայումս կա 21 «քաղբանտարկյալ», որոնց թվում հատկապես Սարգիս Ասլանյանն ու Ռոման Մնացականյանն առայսօր խցերում են»,- ասաց Հարությունյանը։
 
Ըստ նրա՝ նախագահի կողմից հայտարարված համաներումը պետք է տարածվի հատկապես նրանց վրա, քանի որ գոյություն չունի ինրանց մեղքի որևէ խելամիտ հիմնավորում։

Միաժամանակ Հարությունյանն ընդգծեց, որ Ասլանյանը Ղարաբաղի ազատագրական շարժման մասնակից է, և նրան չկատարած հանցագործության համար պատժի ենթարկելն ավելի քան հակաժողովրդական քայլ է։

Իրավապաշտպանը նշեց, որ համաներմամբ ազատման գործընթացը կավարտվի մինչև 2009 թվականի սեպտեմբերի 30-ը, և Հայ ազգային կոնգրեսը կսպասի իշխանություններից «անմեղ» բանտարկյալների ազատման վերաբերյալ արդար լուծումների։

ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:

Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա։

Հուլիսի 24-ի դրությամբ՝ համաներումով ազատ է արձակվել 691 մարդ 407 քրեական գործով։ -0-