ՀՀ նախագահը հաստատել է Թուրքիա այցելելու պատրաստակամությունը միայն հայ-թուրքական սահմանի բացման դեպքում
ՀՀ նախագահ Սերժ Սարգսյանը հաստատել է Թուրքիա այցելելու իր մտադրությունը միայն հայ-թուրքական սահմանի բացման պարագայում:
«Նախագահ Տադիչի հետ հանդիպման ժամանակ ես հաստատեցի, որ կընդունեմ հրավերը միայն Հայաստանի և Թուրքիայի միջև ավելի վաղ ձեռք բերված համաձայնությունների իրագործմանն ուղղված իրական քայլերի առկայության դեպքում: Այսինքն` ես կայցելեմ Թուրքիա, եթե մենք ունենանք բաց սահման կամ գտնվենք Հայաստանի ապաշրջափակման նախաշեմին»,- երեքշաբթի ասել է Սարգսյանը Սերբիայի նախագահ Բորիս Տադիչի հետ համատեղ մամուլի ասուլիսի ժամանակ:
ՀՀ նախագահի խոսքերով՝ ինքը տեղեկացրել է Տադիչին հայ-թուրքական հարաբերությունների կարգավորմանն ուղղված իր նախաձեռնությունից հետո ստեղծված իրավիճակի մասին:
Սարգսյանը հիշեցրել է, որ Հայաստանի և Թուրքիայի ֆուտբոլի ազգային հավաքականների պատասխան հանդիպմանը, որին ինքը հրավիրվել է Թուրքիայի նախագահ Աբդուլա Գյուլի կողմից, քիչ ժամանակ է մնացել:
«Ներկա պայմաններում մենք ակնկալում ենք, որ կդառնանք կառուցողական քայլերի վկան, որոնցով մեր գործընկերները կփորձեն համապատասխան մթնոլորտ ստեղծել՝ Հայաստանի նախագահի պատասխան այցի համար», - նշել է ՀՀ նախագահը:
Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը փակ է 1993 թ.-ից՝ պաշտոնական Անկարայի նախաձեռնությամբ:
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, ղարաբաղյան հակամարտության կարգավորման գործում ադրբեջանական դիրքորոշումներին Անկարայի աջակցության, ինչպես նաև Օսմանյան կայսրությունում 1915 թ.-ին տեղի ունեցած Հայոց ցեղասպանության միջազգային ճանաչման գործընթացի նկատմամբ Թուրքիայի կտրուկ արձագանքի հետ:
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները:-0-
