Հայաստանի և Ադրբեջանի նախագահների մոսկովյան հանդիպման ժամանակ որևէ տարածք վերադարձնելու ժամանակացույց չի քննարկվել. ԱԳՆ ղեկավար

ԵՐԵՎԱՆ, 20 հուլիսի. /Նովոստի-Արմենիա/. Հայաստանի և Ադրբեջանի նախագահների մոսկովյան հանդիպման ժամանակ որևէ տարածքի վերադարձի ժամանակացույց չի քննարկվել, երկուշաբթի ճեպազրույցի ժամանակ հայտնեց ՀՀ ԱԳՆ ղեկավար Էդվարդ Նալբանդյանը:

Ռուսաստանի, Ադրբեջանի, Հայաստանի նախագահներ Դմիտրի Մեդվեդևի, Իլհամ Ալիևի և Սերժ Սարգսյանի հանդիպումը տեղի է ունեցել Մոսկվայում հուլիսի 18-ին: Երեք երկրի նախագահները քննարկել են ղարաբաղյան հակամարտության կարգավորման հետագա ճանապարհները:

«Հայաստանը Մադրիդյան սկզբունքներին հավանություն չի տվել և նման հայտարարությոսւններ չի արել պաշտոնական մակարդակում: Մենք միշտ հայտարարել ենք, որ Մադրիդյան սկզբունքերը հիմք են բանակցությունների համար»,-ասաց Նալբանդյանը:

Հակամարտությունը կարգավորող Մադրիդյան սկզբունքների թվում են, մասնավորապես՝ Լեռնային Ղարաբաղի կարգավիճակի սահմանումը՝ ազատ կամարտահայտության միջոցով, Լեռնային Ղարաբաղի և Հայաստանի միջև ցամաքային կապի ապահովումը, անվտանգության երաշխիքների տրամադրումը, վերահսկվող տարածքներից զորքի դուրսբերումը:

«Ինչ վերաբերում է այն հայտարարություններին, թե իբր քննարկվում է ինչ-որ տարածքներ վերադարձնելու ժամանակացույցը, կարող եմ ասել, որ մոսկովյան հանդիպման ժամանակ նման հարց ընդհանրապես չի քննարկվել»,- ասաց Նալբանդյանը:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրեցին նրան, որ վերացավ հսկողությունը ոչ միայն Լեռնային Ղարաբաղում, այլև հարակից յոթ շրջանում:

1994թ. մայիսի 12-ին զինադադարի վերաբերյալ կնքված եռակողմ համաձայնագրից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ մահացավ շուրջ 25-30 հազար մարդ, և մոտ մեկ միլիոնն ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվայանից ի վեր հակամարտության խաղաղ կարգավորման ուղղությամբ բանակցություներ են տարվում ԵԱՀԿ Մինսկի խմբի շրջանակներում, որոնց համանախագահներն են ԱՄՆ-ն, Ռուսաստանը և Ֆրանսիան:-0-