Տու-154-ի ավիավթարում զոհվածների աճյուններով սգո թափորը Երևանում ուղեկցում են ոստիկանությունն ու բժիշկները
ԵՐԵՎԱՆ, 18 հուլիսի. /Նովոստի-Արմենիա/. Իրանական Կազվին քաղաքի մերձակայքում Տու-154 ավիավթարում զոհվածների աճյուններով սգո թափորը դուրս եկավ «Զվարթնոց» օդանավակայանից Ճանապարհային ոստիկանության մի քանի ջոկատների և Շտապ օգնության բրիգադների ուղեկցությամբ։
Զոհվածների աճյունները Երևան տեղափոխած ինքնաթիռը վայրէջք կատարեց «Զվարթնոց» օդանավակայանում տեղական ժամանակով ուղիղ ժամը 12։00-ին։ Վթարի զոհերի հարազատներին օդանավակայանում դիմավորեցին կառավարական հանձնաժողովի անդամները, այդ թվում՝ Երևանի փոխքաղաքապետ Կամո Արեյանը, ՀՀ Քաղաքացիական ավիացիայի գլխավոր վարչության պետ Արտյոմ Մովսիսյանը, Արմավիրի մարզպետ Աշոտ Ղահրամանյանը, հոգևորականության ներկայացուցիչներ, ովքեր հոգեհանգստի արարողություն լատարեցին։ Զոհվածների մասունքներով արկղերը տեղավորվեցին դագաղներում։
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:-0-
