ՀՀ կառավարության նիստը սկսելուց առաջ մեկ րոպե լռությամբ հարգել են ավիավթարի հետևանքով զոհվածների հիշատակը

ԵՐԵՎԱՆ, 16 հուլիսի. /Նովոստի-Արմենիա/. Հինգշաբթի ՀՀ կառավարության նիստը սկսելուց առաջ նիստի մասնակիցները մեկ րոպե լռությամբ հարգել են Իրանում ՏՈՒ-154-ի ավիավթարի հետևանքով զոհվածների հիշատակը:

Ինչպես հաղորդում է «Նովոստի-Արմենիա» գործակալության թղթակիցը, նիստից առաջ ՀՀ վարչապետ Տիգրան Սարգսյանն առաջարկել է հարգել ավիավթարի զոհերի հիշատակը:

Վարչապետը հիշեցրել է, որ ՀՀ նախագահի հրամանագրի համաձայն՝ ՀՀ կառավարությանն առընթեր արդեն ստեղծվել է օպերատիվ շտաբ՝ ՀՀ փոխվարչապետ, տարածքային կառավարման նախարար Արմեն Գևորգյանի գլխավորությամբ:

Կառավարության ղեկավարի խնդրանքով ՀՀ ՔԱԳՎ պետ Արտյոմ Մովսիսյանն ավիավթարի վերաբերյալ տեղեկատվություն և մանրամասներ է ներկայացրել:

Սարգսյանն առաջարկել է նաև կառավարության բոլոր անդամներին սեփական առաջարկությունները ներկայացնել հուղարկավորթյան կազմակերպման և ուղևորների մտերիմներին օգնություն ցուցաբերելու վերաբերյալ:

Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Նախնական տվյալների համաձայն՝ ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:-0-