ԵՐԵՎԱՆ, 15 հուլիսի. /Նովոստի-Արմենիա/. ТУ-154 ինքնաթիռները գերհուսալի են, և այսպիսի 14 ինքնաթիռներ թիչքներ էին իրականացնում Հայաստանում 1976 թվականից մինչև 2000-ականների սկզբները, գործնականում՝ անվթար, ասաց Ազգային ավիացիոն ասոցիացիայի նախագահ Դմիտրի Ադբաշյանը «Նովոստի-Արմենիա» գործակալությանը տված հարցազրույցում։
«Ինքնաթիռի մեղքով որևէ ծանր ավիացիոն դեպք այս տարիների ընթացքում մեզ մոր չի եղել»,- ասաց նա։
Ադբաշյանը հիշեց մի դրվագ, երբ կոտրվել էր ինքնաթիռի տուրբինը, «բայց դա պատահում է ցանկացած ինքնաթիռի պարագայում՝ թե մեր, թե օտարերկրյա»։
«Մեր անձնակազմը պատվով այն ժամանակ դուրս եկավ իրավիճակից և բարեհաջող վայրէջք կատարեց։ Այլ արտակարգ դեպքեր չեն եղել»,- ասաց ԱԱԱ նախագահը։
Բացի այդ, Ադբաշյանի խոսքերով, արդեն վերակառուցման տարիներին Հալեպում մի դեպք է եղել, երբ Ту-154-ը սխալ էին բեռնել, ինչպես նաև «կոպիտ խախտել էին ինքնաթիռի կենտրոնը, ինչի պատճառով այն անձնակազմի համար անսպասելիորեն սկսել էր ընկնել»։
«Ես անձամբ եմ զբաղվել այդ ինքնաթիռով, հաշվարկներ կատարել, որոնք փոխանցվել են Ժուկովսկու ակադեմիա (Լենինի, Հոկտեմբերյան հեղափոխության և Կարմիր դրոշի շքանշանակիր, պրոֆեսոր Ն.Ե.Ժուկովսկու անվան ռազմաօդային ինժեներական ակադեմիա – «Նովոստի-Արմենիա»), և պարզվել է, որ խախտված է եղել կենտրոնը, և ինքնաթիռն ընկել է քամու ուժեղ շարժի մեջ»,- պարզաբանեց նա՝ հավելելով, որ «այլևս ТУ-154-ի հետ կախպված որևէ այլ արտակարգ պատահար չի եղել»։
Պատասխանելով այն հարցին, թե որքանով են օտարերկրյա երկրներում ապահովվում ինքնաթիռի տեխնիկական պահպանության ընթացակարգերը, փարձագետը նշեց, որ «այստեղ կարելի է անվերջ կասկածել, բայց բանն այն է, որ Caspian Airlines-ը Ռուսաստանի հետ համատեղ ավիաընկերություն է, և ես կարծում եմ, որ ռուսական կողմը որևէ կոպիտ բացթողում տեխնիկական առումով թույլ չէր տա»։
Իրանում ավիավթարի ենթարկված Թեհրան-Երևան կանոնավոր չվերթն իրականացնող ինքնաթիռում եղել է 153 ուղևոր և անձնակազմի 15 անդամ:
«ՏՈՒ-154» ինքնաթիռն իրականացնում էր Թեհրան-Երևան կանոնավոր չվերթը: Ինքնաթիռն ընկել է Թեհրանից 200 կմ հեռավորության վրա:-0-
