Հայ Առաքելական Եկեղեցու և Վատիկանի միջև ջերմ հարաբերություններ են ձևավորվել, ասաց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը Մայր Աթոռ Սուրբ Էջմիածնում Պավիա քաղաքի (Իտալիա) արքեպիսկոպոսարանի ճեմարանի սաների հետ հանդիպման ընթացքում։ Դեպի Հայաստան ուխտագնացություն իրականացնող պատվիրակությունը գլխավորում է Պավիայի արքեպիսկոպոս Գերապատիվ Ջովաննի Ջուդիչին։
«Վեհափառ Հայրապետը, ողջունելով կաթոլիկ երիտասարդների այցը հայոց հոգևոր կենտրոն, անդրադարձավ Ամենայն Հայոց Կաթողիկոսության և Վատիկանի միջև առկա ջերմ հարաբերություններին, նկատելով որ, իբրև վաղվա հոգևորականներ, այսօրվա ճեմարանականները ապագայում իրենց դրական մասնակցությունը պիտի ունենան այդ հարաբերությունների առավել խորացմանը»,- «Նովոստի-Արմենիա» գործակալությանը հայտնեցին Մայր Աթոռ Սուրբ Էջմիածնի տեղեկատվական համակարգից։
Հանդիպման ընթացքում Վեհափառ Հայրապետը վերհիշեց 2001-ին Հռոմի Պապ Հովհաննես Պողոս Բ-ի այցելությանը Հայաստան, ապա և անցած տարվա իր այցը Հռոմ, որի ընթացքում, ի պատիվ երկու եկեղեցիների ջերմ հարաբերությունների, Հռոմի Ս. Վլաս եկեղեցին տրամադրվեց հայ համայնքին` ծիսակատարությունների համար։
Հանդիպման վերջում Վեհափառ Հայրապետը ներկայացրեց Մայր Աթոռ Սբ. Էջմիածնի հոգևոր-կրթական հաստատությունների գործունեությունը։
Իր հերթին Ջովաննի Ջուդիչի արքեպիսկոպոսը նշեց, որ իրենց համար մեծ պատիվ է լինել Հայաստանում և հանդիպել Հայոց Հայրապետի հետ:
Նրա խոսքով` ինչպես իր, այնպես էլ խմբի մյուս անդամների համար հուզիչ ու տպավորիչ է ծանոթությունը հայոց քրիստոնեական մշակույթի ու ավանդության հետ։ -0-
