Կիպրոսը շահագրգռված է Հայաստանի հետ համագործակցության ամրապնդմամբ. Կիպրոսի ԱԳՆ

ԵՐԵՎԱՆ, 7 հուլիսի. /Նովոստի-Արմենիա/. Կիպրոսը շահագրգիռ է էլ ավելի ամրապնդելու և խորացնելու Հայաստանի հետ համակողմանի համագործակցությունը, ասել է Կիպրոսի արտգործնախարար Մարկոս Կիպրիանուն ՀՀ ԱԳ նախարար Էդվարդ Նալբանդյանի հետ հանդիպման ընթացքում:

Կիպրիանուի խոսքերով, այս մասին է վկայում Կիպրոսի նախագահ Դմիտրիս Խրիստոֆիասի այցը Հայաստան, «որը նոր էջ է բացում երկկողմ հարաբերություններում»:

Կիպրիանուն պաշտոնական այցով գտնվում է Երևանում Կիպրոսի նախագահ Դմիտրիս Խրիստոֆիասի գլխավորած պատվիրակության կազմում:

Ինչպես «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից, հանդիպման ընթացքում արտգործնախարարները քննարկել են հայ-կիպրական հարաբերությունների հետագա ընդլայնմանն առնչվող հարցերի լայն շրջանակ, մասնավորապես` միջազգային կազմակերպություններում փոխգործակցության, արտգործնախարարությունների միջև խորհրդատվությունների անցկացման, տնտեսական համագործակցության և մշակութային փոխանակումների ակտիվացման ուղղությամբ ձեռնարկվելիք քայլերը:

Նալբանդյանն ու Կիպրիանուն քննարկել են նաև Հայաստան - Եվրոպական Միություն հարաբերություններին, Եվրոպական հարևանության քաղաքականության և Արևելյան գործընկերություն ծրագրի շրջանականերում երկկողմ համագործակցության  հնարավորությունները: 

Հանդիպումից հետո Էդվարդ Նալբանդյանի և Մարկուս Կիպրիանուի ներկայությամբ Հայաստանի Քաղաքացիական ծառայության խորհրդի նախագահ Մանվել Բադալյանը և Հայաստանում Կիպրոսի դեսպան Պետրոս Կեստորասը ստորագրել են Փոխըմբռնման հուշագիր Հայաստանի Հանրապետության Պետական ծառայության խորհրդի և Կիպրոսի Հանրապետության Ֆինանսների նախարարության միջև համագործակցության մասին: -0-