Հայաստանի բանտերից մեկում թմրանյութերի անցկացման փորձ է կասեցվել

ԵՐԵՎԱՆ, 3 հուլիսի. /Նովոստի-Արմենիա/. Հայաստանի բանտերից մեկում թմրանյութերի անցկացման ու փոխանցման փորձ է կասեցվել, ուրբաթ «Նովոստի-Արմենիա» գործակալությանը հայտնեց Արդարադատության նախարարության քրեակատարողական վարչության մամուլի քարտուղար Արսեն Բաբայանը:

Նրա խոսքերով, ստացված օպերատիվ տեղեկություններն իրացնելիս պարզվել է, որ Հայաստանի Հանրապետության արդարադատության նախարարության «Վանաձոր» քրեակատարողական հիմնարկում պատիժ կրող Համլետ Ա.-ն իր ընկերներին խնդրել է թմրամիջոց բերել քրեակատարողական հիմնարկ:

Հուլիսի 2-ին դատապարտյալին հասցեագրված հանձնուքի ստուգման արդյունքում հայտնաբերվել է պոլիէթիլենային թաղանթով փաթեթավորված 0,35 գրամ դեղին գույն ունեցող թմրանյութանման զանգված, որը թաքցված է եղել սննդի մեջ:

Ըստ հանձնուքը բերած քաղաքացու բացատրության, իրեն զանգահարել է դատապարտյալ Համլետ Ա.-ն և խնդրել տաքսու վարորդից ստանալ հանձնուք և այն տեղափոխել քրեակատարողական հիմնարկ:

Փաստի առթիվ պատրաստվել են նյութեր, թմրանյութանման զանգվածն ուղարկվել է դատաքիմիական փորձաքննության, կատարվում է քննություն:

«Քրեակատարողական ծառայությունը բազմիցս կոչ է արել որևէ դեպքում չնդունել այլ անձի կողմից քրեակատարողական հիմնարկ տեղափոխելու համար նախատեսված հանձնուքներ, քանի որ նման հանձնուքներում հիմնականում հայտնաբերվում են թմրամիջոցներ և արգելված այլ առարկաներ»,- նշեց քրեակատարողական վարչության մամուլի քարտուղարը:-0-