ԵՐԵՎԱՆ, 26 հունիսի. /Նովոստի-Արմենիա/. «Հազարամյակի մարտահրավերներ» կորպորացիան Հայաստանում շարունակում է երկու ծրագրի ֆինանսավորումը, ասաց Հայաստանում ԱՄՆ արտակարգ և լիազոր դեսպան Մարի Յովանովիչը՝ պատասխանելով «Նովոստի-Արմենիա» գործակալության հարցին, թե հնարավո՞ր է՝ դադարեցվի կորպորացիայի կողմից Հայաստանում իրականացվող մյուս ծրագրերի ֆինանսավորումը կամ կրճատվի դրանց ֆինանսավորման ծավալը:
«ՀՄՀ Հայաստան ծրագրի ոռոգման համակարգի վերանորոգման, ինչպես նաև ֆերմերների ուսուցման բաղադրիչները շարունակվում են», - ասաց Յովանովիչը «Նովոստի-Արմենիա» գործակալությանը տված հարցազրույցի ժամանակ:
«Հազարամյակի մարտահրավերներ» ամերիկյան կորպորցիան դադարեցրել է Հայաստանի գյուղական ճանապարհների շինարարության ծրագրի ֆինանսավորումը՝ իր որոշումը պատճառաբանելով նրանով, որ հանրապետության իշխանությունների ձեռնարկած քայլերը չեն համապատասխանում ժողովրդավարական կառավարման չափանիշներին։
Միաժամանակ Յովանովիչը հիշեցրեց, որ ՀՄՀ-ն աշխատում է այն երկրների հետ, որոնք բավարարում են լավ կառավարման չափորոշիչներին, որոնք ներառում են քաղաքացիական ազատությունների և քաղաքական իրավունքների հանդեպ հարգանք, մամուլի ազատություն և օրենքի գերակայություն:
«ՀՄԿ-ն օրենսդրությամբ իրավասու է աշխատել միայն այն երկրների հետ, որոնք բավարարում են ՀՄԿ-ի ցուցանիշներին: Արդարացի կառավարման վեց ցուցանիշներից Հայաստանը բավարարում է միայն մեկին` կառավարման արդյունավետություն: Քաղաքական իրավունքի, քաղաքացիական ազատությունների, ձայնի և հաշվետվողականության մասով Հայաստանի ցուցանիշները միջինից բավականին ցածր են”,- ընդգծեց ԱՄՆ դեսպանը: -0-
