ՀՀ կրթության և գիտության նախարար Արմեն Աշոտյանը, Կրթության ազգային ինստիտուտի տնօրեն Նորայր Ղուկասյանը և «Ապագան քոնն է» բարեգործական, սոցիալական, հասարակական կազմակերպության նախագահ Նարինե Սարգսյանը հինգշաբթի ստորագրեցին համագործակցության հուշագիր` «Կրթությունն ընդդեմ կոռուպցիայի» ծրագրի իրականացման նպատակով:
Ինչպես հայտնում է ՀՀ կրթության և գիտության նախարարության մամուլի ծառայությունը, ծրագիրն ուղղված է հանրակրթական դպրոցների աշակերտների հակակոռուպցիոն կրթությանը և դաստիարակությանը:
Ծրագիրը կիրականացվի ԱՄՆ ՄԶԳ-ի կողմից ֆինանսավորվող «Հակակոռուպցիոն գործողության մոբիլիզացման ծրագրի» աջակցությամբ։
Ծրագիրն իրականացվելու է երեք փուլով: Առաջին փուլում նախատեսվում է ստեղծել և տպագրել համապատասխան մեթոդներ և նյութեր պարունակող`հակակոռուպցիոն կրթությանն ուղղված մեթոդական ուղեցույց-ձեռնարկ ուսուցչի համար, որը հետագայում կօգտագործվի հանրապետության հանրակրթական դպրոցներում:
Երկրորդ փուլը նախատեսում է ուսուցիչների մեթոդական ուղեցույց-ձեռնարկի փորձնական կիրառմամբ պիլոտային ծրագրի իրականացում Երևանի և ՀՀ մարզերի ութ դպրոցում, որի ընթացքում կկազմակերպվեն հնգօրյա դասընթացներ` ուղղված աշակերտների հակակոռուպցիոն դաստիարակությանը:
Դասընթացներին կհրավիրվեն ուսուցիչներ և կրթության ոլորտի մասնագետներ, որոնք իրենց եզրակացություններն ու կարծիքները կարտահայտեն` անցկացված դասընթացներում օգտագործված նյութերի և մեթոդների օգտակարության և կիրառելիության մասին:
Ծրագրի երրորդ փուլում ՀՀ մարզերի և Երևանի դպրոցների ուսուցիչների համար կանցկացվեն վերապատրաստման եռօրյա դասընթացներ, որի արդյունքում ուսուցիչները կստանան համապատասխան հավաստագրեր, նրանց կտրամադրվեն մեթոդական ուղեցույց-ձեռնարկներ:-0-
