Երևանի պետհամալսարանի ռեկտոր Արամ Սիմոնյանը կոչ արեց Վրաստանի նախագահ Միխայիլ Սահակաշվիլուն մտածել առավելապես հայերով բնակեցված շրջաններում հայոց լեզվին նոր կարգավիճակ տալու խնդրի շուրջ:
«Գուցե ժամանակն է լուրջ մոտենալ առավելապես հայկական բնակչությամբ շրջաններում հայոց լեզվին նոր կարգավիճակ տալու խնդրին, օրինակ, այդ վայրերում գործավարությունը վրացերենի հետ համատեղ իրականացնել հայերեն», - ասաց Սիմոնյանը հիմնգշաբթի համալսարանի ուսանողա-դասախոսական կազմի հետ Սահակաշվիլու հանդիպման ժամանակ:
Ռեկտորի խոսքերով՝ բազմազգ և բազմադավան պետություն կառուցելու ճանապարհին էական դեր է հատկացվում տարբեր հատվածներին կամ խմբերին մշակութային ինքնավարություն տրամադրելուն։
Նա ընդգծեց, որ սա ևս մեկ անգամ կհաստատի, որ Վրաստանի բոլոր քաղաքացիներին հասարակական կյանքին մասնակցելու լիարժեք հնարավորություն է տրամադրվում, և որ խոսքերն ու գործը համընկնում են։
Սիմոնյանն ընդգծեց, որ երկու ժողովուրդների միջև երկկողմ հարաբերությունները դարավոր պատմություն ունեն և վերջին տարիներին ավելի ու ավելի դինամիկ են զարգանում՝ հավելելով, որ այժմ Վրաստանում հայերը ամենախոշոր ու ամենալոյալ ազգային փոքրամասնություններից են։
«Պատմականորեն այնպես է ստացվել, որ Թբիլիսին հայության կենտրոններից մեկն է եղել, այնտեղ ապրել է մի քանի հարյուր հազար հայ և 19-րդ դարում հայերը Թբիլիսիի բնակչության մեծամասնությունն են կազմել»,- ասաց ռեկտորը։
Սիմոնյանը սակայն նշեց, որ օբյեկտիվ ու սուբյեկտիվ պատճառներով նրանց թիվը տարեցտարի նվազում է, և եթե մինչև հեղափոխությունը Թբիլիսիում շուրջ 30 հայկական եկեղեցի կար, ապա այժմ գործում է ընդամենը 2-ը։
Միաժամանակ Սիմոնյանը հույս հայտնեց, որ նախագահ Սահակաշվիլիի այցը Հայաստան երկկողմ հարաբերությունների նոր դրական փուլ կնշանավորի։
Հունիսի 24-25-ին երկօրյա պաշտոնական այցով Հայաստանում էր Վրաստանի նախագահ Միխայիլ Սահակաշվիլին և նրա տիկին Սանդրա Ռուլովսը: --0--
