Տարեսկզբից շուրջ 70 մարդ է դիմել Հայաստանում ապաստան գտնելու խնդրանքով. Միգրացիայի գործակալություն

Տարեսկզբից շուրջ 70 մարդ է դիմել Հայաստանում ապաստան գտնելու խնդրանքով, ասաց ՀՀ տարածքային կառավարման նախարարության Միգրացիայի գործակալության պետ Գագիկ Եգանյանը հինգշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ:

Նրա խոսքերով, հիմնականում դիմել են Իրաքի, Թուրքիայի քաղաքացիները, որտեղ նրանց հետապնդում են քաղաքական, կրոնական կամ էթնիկ հատկանիշների համար, ինչպես նաև Աֆղանստանի քաղաքացիները:

«Վերջին գնահատականներով, Հայաստանում ապաստան փնտրող Իրաքի քաղաքացիների թիվն աստիճանաբար նվազում է, ինչը պայմանավորված է նրանց երկրում տիրող հարաբերական հանդարտությամբ», - ասաց Եգանյանը:

Միաժամանակ նա նշեց, որ մինչև ռազմական գործողությունների մեկնարկը Իրաքի հայկական համայնքը 20 հազար մարդ էր ընդգրկում, իսկ վերջին 4-5 տարվա ընթացքում նրանց գրեթե կեսն արդեն լքել է երկիրը:

«Սակայն, հաշվի առնելով Իրաքում մնացած ազգությամբ հայ քաղաքացիներին, այդ երկրից ապաստան փնտրողների հոսքի աճի հնարավորությունը դեռ պահպանվում է», - ասաց Եգանյանը:

Նա նաև հիշեցրեց, որ ապաստան տրամադրելու դիմումները քննվում են երեք ամսվա ընթացքում, ընդ որում Հայաստանում ապաստան ստանալուց հետո նրանց տրամադրվում է բնակության իրավունք, ինչպես նաև երաշխիք, որ նրանց չեն վերադարձնի նախկին բնակության երկիր:

Միգրացիայի գործակալության տվյալներով՝ 2008 թ.-ի վերջին շուրջ 1200 օտարերկրա քաղաքացի դիմել է Հայաստանում ապաստան ստանալու խնդրանքով: Իրաքում ռազմական գործողությունների մեկնարկից հետո Հայաստան է եկել ազգությամբ հայ 943 իրաքցի, որոնցից 68-ը՝ 2008թ.-ին, և նրանց բոլորին ժամանակավորապես պաշտպանված անձանց կարգավիճակ է տրամադրվել:

2000-2007թթ. ընկած ժամանակահատվածում 1380 մարդ  է դիմել ՀՀ իշխանություններին՝ ապաստան ստանալու խնդրանքով, որոնցից 300-ը՝ միայն 2007թ.-ին:

Նրանցից 1200 քաղաքացուն տրվել է ժամանակավորապես պաշտպանված անձանց կարգավիճակ, մասնավորապես՝ 800-ը Իրաքի քաղաքացիներ են, 400-ը՝ Իսրայելի և Լիբանանի: Միաժամանակ նրանց 25 տոկոսը ազգությամբ հայ չեն: Հիմնական դիմումները ստացվում են Իրանի, Թուրքիայի, Աֆղանստանի, Սոմալիի, Սուդանի քաղաքացիներից, ինչպես նաև երեք դիմում՝ Կուբայի քաղաքացիներից:

Հայաստանում ապաստան հայցողների համար գոյություն ունի երկու կարգավիճակ՝ փախստականի կարգավիճակ և ժամանակավոր ապաստանի կարգավիճակ: Փախստականի կարգավիճակը տրամադրվում է անժամկետ, իսկ ժամանակով ապաստանի կարգավիճակը տրամադրվում է մեկ տարի ժամկետով՝ կարգավիճակը երկարացնելու հնարավորությամբ:-0-