Հայաստանի և Թուրքիայի միջև հարաբերությունները պետք է կառուցվեն առանց նախապայմանների. ՀՀ նախագահ
Հայաստանի և Թուրքիայի միջև հարաբերությունները պետք է կառուցվեն առանց նախապայմանների, հայտարարել է ՀՀ նախագահ Սերժ Սարգսյանը:
«Այս հարցում մեր մոտեցումը չափազանց պարզ է. հարաբերությունները պետք է կառուցվեն առանց նախապայմանների: Տարածաշրջանի երկրները պետք է գտնեն շփման ընդհանուր եզրեր՝ չնայած գոյություն ունեցող տարաձայնություններին», - ասել է Սարգսյանը չորեքշաբթի մամուլի ասուլիսի ժամանակ:
Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը փակ է 1993 թ.-ից՝ Անկարայի նախաձեռնությամբ։
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Բացի այդ, Թուրքիան զբաղեցնում է ակնհայտ ադրբեջանամետ դիրքորոշում՝ ղարաբաղյան հակամարտության կարգավորման խնդրում։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
