ՀՀ վարչապետ Տիգրան Սարգսյանը կոչ է արել հայ ուսանողներին չանհանգստանալ աշխարհի առաջատար համալսարաններում ուսման վարձի արժեքի համար՝ խոստանալով «Լույս» հիմնադրամի աջակցությունը բուհեր ընդունվելու դեպքում:
«Ֆինանսների պակասը մեր խնդիրն է: Դուք ընդունվեք, իսկ մենք կգտնենք միջոցներ», - հայտարարեց Սարգսյանը չորեքշաբթի Երևանի պետական համալսարանի ուսանողների հետ հանդիպման ժամանակ:
Վարչապետը տեղեկացրեց, որ արտասահմանում ընդունակ հայ ուսանողների կրթական ծրագրի համար 2009թ.-ին հիմնադրամը նախատեսել է 400 մլն դրամ, սակայն այդ գումարը չբավարարելու դեպքում վարչապետը խոստացավ գտնել լրացուցիչ միջոցներ:
ՀՀ կառավարության ղեկավարը նշեց, որ «Լույս» հիմնադրամը մասնավոր նախաձեռնություն է, որը կապված չէ պետական ֆինանսական միջոցների հետ, այն գործելու է բարեգործական հիմունքներով:
Նա ընդգծեց, որ հաշվի առնելով այն, որ հիմնադրամը գտնվում է ՀՀ նախագահի հովանու ներքո՝ նրա գործունեությունն առավելագույն կերպով թափանցիկ կլինի: Այս կապակցությամբ նա նշեց, որ հիմնադրամի 2008թ.-ի գործունեության մասին ֆինանսական հաշվետվությունը, աուդիտորական ստուգման հետ միասին, հրապարակվել է «Հայաստանի Հանրապետություն» թերթում:
Վարչապետը տեղեկացրեց, որ ուսման համար դրամաշնորհների տրամադրմամբ զբաղվող հատուկ Խորհրդի կազմում կընդգրկվեն ՀՀ վարչապետը, ՀՀ նախագահի աշխատակազմի ղեկավարի տեղակալ Վիգեն Սարգսյանը, Կենտրոնական բանկի փոխնախագահ Վաչե Գաբրիելյանը, «Այբ» կրթական հիմնադրամի հոգաբարձուների խորհրդի նախագահ, քահանա Մեսրոպ Արամյանն ու ընդդիմադիր «Ժառանգություն» խմբակցությունից ԱԺ պատգամավոր Անահիտ Բախշյանը:
Ինչ վերաբերում է Ժակլին Կարաասլանյանին հիմնադրամի կրթական ծրագրի գործադիր տնօրենի պաշտոնում ընտրելու հանգամանքին, ապա վարչապետը ընդգծեց, որ նրա թեկնածությունը լավագույնն էր ներկայացվածների շրջանում, իսկ ընտրություններն առավելագույնս թափանցիկ էին: Վարչապետը կոչ արեց բոլորին աջակցել Կարաասլանյանին իր աշխատանքում:
Կարաասլանյանն իր հերթին նշեց, որ ինքը միանգամից համաձայնվել է ղեկավարել ծրագիրը: «Իմ մասնագիտական գործունեության քսանհինգ տարիները պատրաստել են ինձ այս աշխատանքի համար», - հայտարարեց նա:
Նրա խոսքերով, ծրագիրը երկու կարևոր առաքելություն ունի՝ ավելացնել համաշխարհային առաջատար համալսարաններում հայ ուսանողների թիվը, ինչպես նաև կապել նրանց միմյանց և հայրենիքի հետ:
Արտահայտված այն մտավախությունների առնչությամբ, թե ուսանողները ուսման ավարտից հետո կարող են չվերադառնալ Հայաստան, վարչապետը նշեց, որ այժմ չկան իրավաբանական մեխանիզմներ, որոնք կխոչընդոտեին դրան, սակայն նա խոստացավ, որ հիմնադրամը կփնտրի հայրենիք չվերադարձած ուսանողների ուսման վարձերի փոխհատուցման մեխանիզմներ:
Ինչ վերաբերում է հիմնադրամի հասցեին հնչած քննադատությանը, ապա Սարգսյանի խոսքերով, նա հանգիստ է վերաբերվում դրան՝ նշելով, որ յուրաքանչյոււր հասարակությունում և պետությունում նման հանրային նշանակություն ունեցող ծրագրերի նկատմամբ տարբեր տեսակետներ են լինում, և դա նորմալ է:
ՀՀ վարչապետը նաև ավելացրեց, որ կրթական ծրագիրը հիմնադրամի բաղկացուցիչներից միայն մեկն է, և հիմնադրամն իրականացնում է շատ այլ նախագծեր և միջոցառումներ, որոնց թվում նա նշեց հիմնադրամի աջակցությամբ անցկացված համաշխարհային ռոքի լեգենդ Jethro Tull բրիտանական խմբի համերգն ու աշխարհահռչակ հայ երաժիշտ Ջիվան Գասպարյանի հոբելյանական երեկոն:-0-
