Հայաստանում հայտարարված համաներման արդյունքում արդեն 103 հոգի ազատ է արձակվել

ՀՀ խորհրդարանի կողմից հունիսի 19-ին հայտարարված համաներման արդյունքում երեքշաբթի օրվա դրությամբ արդեն 103 մարդ է ազատ արձակվել, տեղեկացրել է ՀՀ արդարադատության նախարարության քրեակատարողական վարչության մամուլի քարտուղար Արսեն Բաբայանը:

«Հունիսի 23-ի դրությամբ ազատ արձակվածներից հինգը կանայք են և երեքը՝ անչափահասներ: Եվս չորս դատապարտվածի համար կրճատվել է պատիժ կրելու ժամկետը», - ասաց Բաբայանը:

Միաժամանակ վարչության մամուլի քարտուղարը դժվարացել է ներկայացնել 2008թ.-ի մարտյան անկարգությունների գործով համաներման արժանացածների հստակ թիվը:

Վարչության տվյալների համաձայն՝ հունիսի 23-ի դրությամբ ՀՀ տարբեր քրեակատարողական հաստատություններից ազատ են արձակվել, մասնավորապես՝ ՀՀ ՆԳՆ՝ հետախուզման մեջ գտնվող ղեկավար Վանո Սիրադեղյանի պահակախմբի նախկին պետ Սուրեն Սիրունյանը, ՀՀ ԱԳ նախկին նախարար Ալեքսան Արզումանյանը, պատգամավորներ Մյասնիկ Մալխասյանն ու Հակոբ Հակոբյանը, Գլխավոր դատախազի նախկին տեղակալ Գագիկ Ջհանգիրյանը:

Ինչպես տեղեկացրեց Բաբայանը, ՀՀ արդարադատության նախարարության քրեակատարողական վարչության մամուլի ծառայությունն ամեն օր մամուլին կտեղեկացնի համաներման արդյունքում ազատ արձակվածների մասին տվյալները:

ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:

Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում:-0-