ՀՀ ոստիկանությունը նախագահի նստավայրի մոտ թույլ չի տվել բողոքի ակցիա անցկացնել Սահակաշվիլու այցի կապակցությամբ
ԵՐԵՎԱՆ, 24 հունիսի. /Նովոստի-Արմենիա/. ՀՀ ոստիկանությունը չորեքշաբթի «Միտք» վերլուծական կենտրոնին թույլ չի տվել նախագահի նստավայրի մոտ բողոքի ակցիա անցկացնել Վրաստանի նախագահ Միխայիլ Սահակաշվիլու այցի կապակցությամբ։
Իրավապահ մարմիններն իրենց արգելելը բացատրեցին նրանով, որ հայկական պետության ղեկավարի նստավայրի տարածքում թույլ չի տրվում նման ակցիաներ անցկացնել։
«Միտք» վերլուծական կենտրոնի ներկայացուցիչները մտադիր էին բողոքի ակցիա կազմակերպել՝ բարձրացնելու Վրաստանի վարած պետական (եկեղեցական, կրթամշակութային, տնտեսական, լեզվական և այլն) խտրական քաղաքականությանն առնչվող հարցերը:
«90-ականներից սկսած վրացական իշխանությունների կողմից պետական մակարդակով Ջավախքի հայերի և Վրաստանում ապրող հայերի հանդեպ ընդհանրապես խտրականություն է դրսևորվում»,- «Նովոստի-Արմենիա» գործակալությանն ասաց «Միտք» վերլուծական կենտրոնի փորձագետ Վահե Սարգսյանը։
Նրա խոսքերով՝ ակցիայի մասնակիցները մտադիր էին պահանջել, որպեսզի Ջավախքում հայոց լեզվին միջազգային իրավունքի նորմերի համաձայն՝ պետականի կարգավիճակ տրվի, դադարեցվեն չափազանց մանրակրկիտ ստուգումները Ջավախքի ու Հայաստանի սահմանին, որոնք նվաստացնում են ջավախահայերին։
Նա նաև հայտարարեց, որ «Վրաստանն այսօր մշակութային ցեղասպանություն է վարում հայերի հանդեպ»։
«Հայ-վրացական սահմանին մեզ նույնիսկ թույլ չեն տալիս Հայաստանից հայկական գրքեր ու հրապարակումներ փոխադրել՝ դա մեկնաբանելով վերևից եկած հրամանով»,- նշեց Սարգսյանը։
Սարգսյանը նշեց նաև, որ վերջերս հայ պատգամավորի՝ Վրաստան մուտք գործելն արգելելը «բացահայտ թշնամանքի դրսևորում է»։
Նա հավելեց, որ «Միտք» վերլուծական կենտրոնը պահանջում է, որպեսզի վրացական իշխանությունները քննարկեն տվյալ հարցերն ու համապատասխան եզրակացություններ անեն։
Վրացի սահմանապահները հունիսի 19-ին իշխող ՀՀԿ-ից հայկական խորհրդարանի պատգամավոր, «Ջավախք» հայրենակցական բարեգործական միության նախագահ Շիրակ Թորոսյանին առանց բացատրության արգելել են մուտք գործել Վրաստանի տարածք: Այդ կապակցությամբ ՀՀ ԱԳՆ-ն հարցում է ուղղել Վրաստանի ԱԳՆ, սակայն դեռևս պատասխան չի ստացել:
ՀՀ նախագահ Սերժ Սարգսյանի հրավերով չորեքշաբթի երկօրյա պաշտոնական այցով Հայաստան են ժամանել Վրաստանի նախագահ Միխայիլ Սահակաշվիլին և նրա տիկին Սանդրա Ռուլովսը:--0--
