Վրաստանի նախագահը Հայաստանը դիտում է որպես գործընկեր

Վրաստանի նախագահ Միխայիլ Սահակաշվիլին Հայաստանը դիտում է որպես գործընկեր:

«Մենք շատ սերտ կապեր ունենք Հայաստանի ղեկավարության հետ, մշտապես շփվում ենք տարբեր միջազգային միջոցառումների շրջանակներում»,- ասաց նա Հայաստանի Հանրային հեռուստաընկերությանը տված հարցազրույցում իր այցի նախօրեին:

ՀՀ նախագահ Սերժ Սարգսյանի հրավերով չորեքշաբթի երկօրյա պաշտոնական այցով Հայաստան կժամանեն Վրաստանի նախագահ Միխայիլ Սահակաշվիլին և նրա տիկին Սանդրա Ռուլովսը:

Վրաստանի առաջնորդը նշել է, որ երբ խոսք է լինում Վրաստանի նախագահի պաշտոնական այցի մասին Հայաստան, «դա փոքր-ինչ կեղծ է հնչում, քանի որ մեր հարաբերություններն ավելին են, քան պաշտոնական հարաբերությունները երկու երկրների միջև:

Դրանք եղբայրական ժողովուրդների հարաբերություններ են, երկրների, որոնք շատ մտերիմ են, իսկ ճակատագրերը միահյուսված են: Մենք այստեղ միշտ գտնում ենք փոխըմբռնում և հիանալի գործընկերություն»,- ասել է նա:

Սահակաշվիլու խոսքերով՝ Երևան իր այցի շրջանակներում կողմերը կքննարկեն տնտեսական գործունեությունը համաշխարհային ճգնաժամի պայմաններում, ինչպես նաև համագործակցության հնարավորությունները տարածաշրջանային համատեքստում։

Ընդգծելով, որ տվյալ պահին Բաթումիի բարեկարգման լայնամասշտաբ աշխատանքներ են տարվում, որոնք գտնվում են նախագահի անմիջական հսկողության ներքո, Սահակաշվիլին կարևորեց այն, որ «հայերն այնտեղ մուտք  ունենան»։

«Ես չեմ հավատում կեղծ խոչընդոտներին ու փակ սահմաններին, ես հավատում եմ մարդկանց միջև փոխադարձ համագործակցությանը, տնտեսական շահին, իսկ դրա համար պահանջվում են ճանապարհներ, հաղորդակցության միջոցներ, որոնք կօգնեն մարդկանց շփվել, խոսել միմյանց հետ և հարամարավետ զգալ իրենց՝ ուր էլ, որ մեկնեն։ Սա հենց այն է, ինչին պետք է հասնեն մեր երկրները»,- ասել է նա։ -0-