ՀՀ վարչապետը ԼՂՀ-ում կմասնակցի Bridge Artsakh տնտեսական ֆորումին

ՀՀ  վարչապետ Տիգրան Սարգսյանը  հունիսի 20-21-ը աշխատանքային այցով կմեկնի Լեռնային Ղարաբաղի Հանրապետություն` մայրաքաղաք Ստեփանակերտում հրավիրված «BRIDGE ARTSAKH» տնտեսական համաժողովին մասնակցելու նպատակով: 

Այցի շրջանակում  նախատեսվում է նաև ՀՀ  վարչապետի գլխավորած պատվիրակության  հանդիպումը ԼՂՀ  կառավարության անդամների հետ:

Պատվիրակության  կազմում են ՀՀ կառավարության աշխատակազմի ղեկավար  Դավիթ Սարգսյանը, ՀՀ ֆինանսների նախարար Տիգրան Դավթյանը, ՀՀ Էկոնոմիկայի  նախարար Ներսես Երիցյանը, ՀՀ գյուղատնտեսության նախարար Գերասիմ Ալավերդյանը, ՀՀ քաղաքաշինության նախարար Վարդան Վարդանյանը, ՀՀ տրանսպորտի և կապի նախարար Գուրգեն Սարգսյանը, պաշտոնատար  այլ անձինք:

Bridge Artsakh տնտեսական համաժողովը կանցկացվի Լեռնային Ղարաբաղի Հանրապետության մայրաքաղաք Ստեփանակերտում 2009թ. հունիսի 19-ից 21-ը:

Համաժողովին, որի գլխավոր թեման է «Պետություն և բիզնես` երկխոսությունից դեպի համագործակցություն», կմասնակցեն Լեռնային Ղարաբաղի և Հայաստանի ու այլ պետությունների, պաշտոնական կառույցների ներկայացուցիչներ, բանկային միությունների, ֆերմերների, գործարարների, տնտեսության տարբեր ոլորտների ներկայացուցիչներ և այլ շահագրգռված անձինք։

Bridge Artsakh-ի գլխավոր նպատակն է` ծանոթանալ Հայաստանի և արտերկրի գործնական և քաղաքական շրջանակների և Լեռնային Ղարաբաղի Հանրապետության սոցիալ-տնտեսական ներուժի հետ: Համաժողովն ունի խիտ գործնական գրաֆիկ, կազմված է սեկցիոն և ընդլայնված նիստերից, կլոր սեղաններից: Ընդլայնված նիստի հիմնական զեկույցը կներկայացնի Արցախի ներդրումային հիմնադրամը` «Արցախի ներդրումային գրավչությունը» թեմայով:

Հայաստանի Արդյունաբերողների և գործարարների միությունը և «Մաստեր» միջազգային ինտեգրման աջակցության կենտրոնի կողմից կազմակերպված Bridge Artsakh ֆորումը կանցկացվի Արցախի նախագահի բարձր հովանու ներքո և Հանրապետության կառավարության աջակցությամբ: Ֆորումի կազմակերպման պաշտոնական գործընկերը Արցախի ներդրումային հիմնադրամն է։ -0-