«Բջնի» հանքային ջրերի գործարանը մոտակա օրերին կսկսի լիարժեք կերպով աշխատել

ԵՐԵՎԱՆ, 17 հունիսի. /Նովոստի-Արմենիա/. «Բջնի» հանքային ջրերի գործարանը մոտակա օրերին կսկսի լիարժեք կերպով աշխատել, աշխատակիցներին ասել է գործարանի՝ դատարանի որոշմամբ նշանակված սնանկացման գծով կառավարիչը:   

«Մեզ հայտնի դարձավ, որ դատարանի վճռով նշանակված կառավարիչն արդեն իսկ այցելել է գործարան, հանդիպել գործարանի աշխատակիցներին և հայտնել, որ 6-ամսյա պարապուրդից հետո կիրականացվեն վերականգնողական աշխատանքներ և մոտ օրերին գործարանը կսկսի գործել իր ողջ հզորությամբ»,- ասվում է «Նովոստի-Արմենիա» գործակալություն եկած հաղորդագրության մեջ:

«Բջնի» հանքային ջրերի գործարանի գործունեությունը, որի բաժնետերն է հետախուզման մեջ գտնվող ԱԺ պատգամավոր Խաչատուր Սուքիասյանը, դադարեցվել էր 2008 թ.-ի աշնանը, իսկ գործարանի ունեցվածքը բռնագրավվել է ՀՀ արդարադատության նախարարության դատական ակտերի հարկադիր կատարման ծառայության կողմից։

Ավելի վաղ Պետեկամուտների կոմիտեն գործարանին էր ներկայացրել պետբյուջեի օգտին 4 միլիարդ 67 մլն 201 հազ. 600 դրամի բռնագանձման ցանկ՝ հարկային պարտավորությունների խախտման պատճառով՝ Վարչական դատարանի 2008 թ.-ի հոկտեմբերի 10-ի որոշման համաձայն։

Սուքիասյանը գտնվում է հետախուզման մեջ Երևանում մարտի 1-2-ի զանգվածային անկարգությունների գործի առնչությամբ։-0-