Հայաստանը ստորագրել է ՏՐԱՍԵԿԱ Մուլտիմոդալ տրանսպորտի զարգացման մասին համաձայնագիրը

ԵՐԵՎԱՆ, 17 հունիսի. /Նովոստի-Արմենիա/. Հայաստանը ստորագրել է ՏՐԱՍԵԿԱ Մուլտիմոդալ տրանսպորտի զարգացման մասին համաձայնագիրը, «Նովոստի-Արմենիա» գործակալությանը տեղեկացրեց ՀՀ տրանսպորտի և կապի նախարարի մամուլի քարտուղար Սուսաննա Տոնոյանը:

«Համաձայնագիրը ՀՀ կառավարության անունից ստորագրել է ՀՀ տրանսպորտի և կապի նախարար Գուրգեն Սարգսյանը, ով մասնակցում էր հունիսի 15-16-ը Ղրղզստանի Իսիկ-Կուլում կայացած ՏՐԱՍԵԿԱ միջկառավարական հանձնաժողովի տարեկան նիստում», - նշեց Տոնոյանը:

Նրա խոսքերով՝ Համաձայնագիրը կարգավորում է տրանսպորտային կազմակերպությունների, մուլտիմոդալ տրանսպորտային օպերատորների, բեռնառաքողների, բեռը ստացողների, այլ ֆիզիկական և իրավաբանական անձանց միջև հարաբերությունները, որոնք մուլտիլոդալ ծառայություններ իրականացնելիս հանդես են գալիս բեռի տիրոջ անունից, ինչպես նաև սահմանում է իրավունքներ, պարտականություններ և պատասխանատվություն` տրանսպորտային գործողությունների յուրաքանչյուր մասնակցի համար:

Տոնոյանը նաև տեղեկացրեց, որ Ադրբեջանը այս համաձայանգիրը ստորագրել է վերապահումով: ՏՐԱՍԵԿԱ միջկառավարական հանձնաժողովի նիստում հանձնաժողովի մշտական քարտուղարության գլխավոր քարտուղար է ընտրվել Ղրղզստանի ներկայացուցիչը` Ղրղզստանի տրանսպորտի նախկին նախարար Ժանտորո Սատիբալդիևը:

Մուլտիմոդալ տրանսպորտը առնվազն երկու տարբեր տրանսպորտային ձևերի մասնակցությամբ բեռնափոխադրումների իրականացումն է:

ТРАСЕКА նախագիծը ստորագրվել է 1993 թ.-ին Բրյուսելում՝ Եվրահանձնաժողովի նախաձեռնությամբ: Նախագծի նպատակը Եվրոպա-Կովկաս-Ասիա տրանսպորտային միջանցքի զարգացումն է, այլընտրանքային ուղիների ստեղծումն է՝ կիրառելով գոյություն ունեցող ենթակառուցվածքները բեռնափոխադրումներ իրականացնելու համար: Այժմ ТРАСЕКА-ի մասնակից-պետությունների թվում են Հայաստանը, Բուլղարիան, Վրաստանը, Ադրբեջանը, Ղազախստանը, Ղրղզստանը, Մոլդովան, Ռումինիան, Տաջիկստանը, Թուրքմենստանը, Թուրքիան, Ուկրաինան:-0-