Համաներում հայտարարելու անհրաժեշտությունը կապված չէ միայն մարտյան դեպքերի գործով դատապարտվածների հետ. ՀՀԿ ներկայացուցիչ
Հայ հասարակության մեջ արդեն վաղուց հասունացել է համաներում անցկացնելու անհրաժեշտությունը, որը կապված է ոչ միայն մարտյան դեպքերի, այլև աննշան բնույթի հանցագործությունների հետ, կարծում է ՀՀԿ խմբակցության անդամ, ՀՀ ԱԺ մարդու իրավունքների պաշտպանության և հասարակական հարցերի մշտական հանձնաժողովի փոխնախագահ Ռաֆիկ Պետրոսյանը:
«Համաներումն անցկացվում է այն ժամանակ, երբ երկրում հասարակական անհրաժեշտություն է ծագում ազատելու նրանց, ովքեր ծանր հանցագործություն չեն գործել, վտանգ չեն ներկայացնում և զղջում են կատարած չարագործության համար: Մեր հասարակության շրջանում նման անհրաժեշտություն կա, և դա կապված է ոչ միայն մարտյան դեպքերի, այլ աննշան բնույթի հանցագործությունների հետ»,- երկուշաբթի մամուլի ասուլիսի ժամանակ հայտարարեց Պետրոսյանը:
Ընդ որում նա հիշեցրեց, որ համաներում Հայաստանում վերջին անգամ անցկացվել է 2006թ.-ի հունիսի 7-ին:
Խորհրդարանականի խոսքերով, համաներումը վստահության ու հանդուրժողականության մթնոլորտ ստեղծելու լավագույն միջոցն է, հասարակության մեջ փոխզիջումների գնալու գործիքը:
Այս առնչությամբ Պետրոսյանը կարծում է, որ այնպիսի անհանգիստ հասարակության մեջ, ինչպիսին է հայ հասարակությունը, դրա անցկացման անհրաժեշտությունն ավելի շատ է զգացվում:
ՀՀ նախագահ Սերժ Սարգսյանը մայիսի 8-ին բոլոր քաղաքական ուժերին և հասարակական գործիչներին, մասնավորապես, Հանրային խորհրդին, առաջարկել է իրենց առաջարկները ներկայացնել համաներման անցկացման անհրաժեշտության և կարգի վերաբերյալ։
Հանրային խորհուրդը հունիսի 10-ին հայտարարել է ՀՀ նախագահ Սերժ Սարգսյանին համաներում հայտարարելու առաջարկ անելու մտադրության մասին:
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ին բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։-0-
