ԱՊՀ երկրների պատմության ինստիտուտների միջազգային ասոցիացիայի հինգերորդ նիստը և երիտասարդ պատմաբանների «Ամառային դպրոցն» է բացվել երկուշաբթի Երևանում։
«Այս նիստում մենք ամփոփում ենք տարին։ Կքննարկվեն այն ձեռքբերումները, որոնք մենք ունեցել ենք ԱՊՀ երկրներում պատմության ոլորտում նախորդ տարվա ընթացքում»,- լրագրողներին հայտնեց ՌԴ գիտությունների ակադեմիայի ընդհանուր պատմության ինստիտուտի տնօրեն, ՀՀ ԳԱԱ արտասահմանյան անդամ, ակադեմիկոս Ալեքսանդր Չուբարյանը։
Միջոցառման ընթացքում կանցկացվի կլոր սեղան «Խորհրդային հանրապետությունների իրավական կարգավիճակը. ընդհանուրն ու առանձնահատուկը» թեմայով։
Չուբարյանը կարևորեց ԱՊՀ երկրների երիտասարդ պատմաբանների «Ամառային դպրոցը», որը կանցկացվի հունիսի 15-21-ը՝ նշելով, ամառային դպրոցի թեման է այս տարի «Առօրյա կյանքը»։
«Սա արդեն չորրորդ ամառային դպրոցն է։ Եվ տարեցտարի դպրոցին մասնակցող երկրների շրջանակն ընդլայնվում է։ Երիտասարդ գիտնականները շփվում են միմյանց հետ, փորձ են փոխանակում, անձնական կապեր են հաստատում, ինչը շատ կարևոր է»,- ասաց Ասոցիացիայի նախագահը։
Նա հայտնեց նաև, որ ամառային դպրոցին մասնակցում են ԱՊՀ բոլոր երկրները, բացի Ադրբեջանից և Թուրքմենստանից, թեև նրանք հրավիրվել են։
Իր հերթին ՀՀ արտաքին գործերի փոխնախարար, պատմաբան Արման Կիրակոսյանը նշեց, որ ԱՊՀ երկրների միջև համագործակցությունը գիտական ոլորտում շատ կարևոր է։
«Կարևոր է, հատկապես, որպեսզի տարբեր երկրների պատմաբանները կազմակերպեն նմանատիպ հանդիպումներ և խոսեն իրենց ձեռքբերումների մասին»,- ընդգծեց Կիրակոսյանը՝ հավելելով, որ համագործակցությունը ԱՊՀ երկրների միջև Հայաստանի արտաքին քաղաքականության գերակա ուղղություններից է։
ԱՊՀ երկրների պատմության ինստիտուտների միջազգային ասոցիացիան հիմնադրվել է 2005 թվականի դեկտեմբերին։ ՀՀ ԳԱԱ պատմության ինստիտուտը Ասոցիացիայի անդամ է։ Ասոցիացիայի կողմից հիմնվել և հրատարակվում է Ասոցիացիայի աշխատանքը լուսաբանող և գիտական բարձր արժեք ունեցաղ հոդվածներ հրապարակող «Պատմական տարածք» ամսագիրը։ -0-
